logo_geo
eng_logo
საგარეო საქმეთა სამინისტრო: გაეროს უშიშროების საბჭოს წევრებმა მტკიცედ განაცხადეს საქართველოს ტერიტორიული მთლიანობის უპირობო მხარდაჭერა
- +

6 აგვისტო. 2020. 03:03

 

 

 

5 აგვისტოს გაეროს უშიშროების საბჭოს დახურულ სხდომაზე განიხილეს საკითხი - „მდგომარეობა საქართველოში“. ინფორმაციას ამის შესახებ საქართველოს საგარეო საქმეთა სამინისტრო ავრცელებს. უწყებაში აღნიშნავენ, რომ სხდომის დასრულების შემდგომ, ბელგიის, ესტონეთის, საფრანგეთის, გერმანიის, დიდი ბრიტანეთის, აშშ-ს, აგრეთვე ირლანდიისა და ნორვეგიის სახელით გაეროში გერმანიის მუდმივი წარმომადგენლის მოადგილემ გააკეთა განცხადება პრესისათვის. აღინიშნა, რომ 7 აგვისტოს რუსეთ-საქართველოს კონფლიქტის დაწყებიდან 12 წელი სრულდება.

 

საბჭომ მოისმინა გენერალური მდივნის მოადგილის მიროსლავ იენჩას მოხსენება აღნიშნულთან დაკავშირებით. წევრმა სახელმწიფოებმა წუხილი გამოხატეს, რომ 2008 წლის 12 აგვისტოსა და 8 სექტემბერს დადებული შეთანხმებების შემდგომ მიღწეული პროგრესი მცირეა. მათ მტკიცედ განაცხადეს საქართველოს დამოუკიდებლობის, სუვერენიტეტისა და ტერიტორიული მთლიანობის უპირობო მხარდაჭერა მის საერთაშორისოდ აღიარებულ საზღვრებში.

 

„განცხადებაში აღნიშნულია, რომ რუსული სამხედრო ძალების ყოფნა საქართველოს აფხაზეთისა და „სამხრეთ ოსეთის“ რეგიონებში და რუსეთის მიერ ამ რეგიონების ე.წ. დამოუკიდებლობის აღიარება, საქართველოს ტერიტორიული მთლიანობის დარღვევას წარმოადგენს, საფრთხეს უქმნის როგორც საქართველოს სუვერენიტეტს, ასევე წესებზე დაფუძნებულ საერთაშორისო წესრიგს და საფრთხეს უქმნის კონფლიქტით დაზარალებული მოსახლეობის ჯანმრთელობასა და სიცოცხლეს.

 

განცხადებაში გამოხატულია უკიდურესი შეშფოთება გასულ წელს და COVID-19-ით გამოწვეული პანდემიის პერიოდში ე.წ. ბორდერიზაციის პროცესის ინტენსიფიკაციის გამო. წევრი სახელმწიფოები აღნიშნავენ, რომ ამ რთულ პერიოდშიც, დე ფაქტო ხელისუფლებები, რომლებიც საქართველოს აფხაზეთისა და „სამხრეთ ოსეთის“ რეგიონებში ეფექტურ კონტროლს ახორციელებენ, აგრძელებდნენ თვითნებური დაკავებების პრაქტიკას ადმინისტრაციული სასაზღვრო ხაზის გასწვრივ. „სამხრეთ ოსეთის“ დე ფაქტო ხელისუფლების წარმომადგენლები არ თანხმდებიან სამედიცინო მიზნებით მოსახლეობის ევაკუაციასა და შესაბამისი ჰუმანიტარული დახმარების მიღებას. განცხადებაში ასევე გამოხატულია შეშფოთება პანდემიისა და ჯანდაცვის საკითხებსა და ლუგარის ცენტრის კრიტიკულად მნიშვნელოვანი საქმიანობის თაობაზე, რუსეთის მიერ წარმოებული სადეზინფორმაციო კამპანიისა და ცრუ პროპაგანდის გამო.

 

განცხადებაში აღნიშნულია, რომ ეს ქმედებები ახანგრძლივებს კონფლიქტს, საფრთხეს უქმნის მშვიდობასა და სტაბილურობას, ხელს უშლის ადამიანის უფლებებისა და თავისუფლებების სრულფასოვან გამოყენებას, უარყოფითად მოქმედებს საქართველოში მოსახლეობის ჯანმრთელობასა და უსაფრთხოებაზე, ახდენს მთელი რეგიონის დესტაბილიზაციას. წევრმა სახელმწიფოებმა კიდევ ერთხელ მოუწოდეს რუსულ მხარეს, სრულად შეასრულოს 2008 წლის 12 აგვისტოსა და 8 სექტემბრის შეთანხმებებით ნაკისრი ვალდებულებები. აქვე ხაზი გაესვა, რომ 12 აგვისტოს ექვსპუნქტიანი შეთანხმება ითვალისწინებს რუსეთის მიერ შეირაღებული ძალების დაპირისპირებამდე არსებულ პოზიციებზე გაყვანას. შეთანხმება ასევე მოუწოდებს მხარეებს უსაფრთხოების საერთაშორისო მექანიზმების ჩამოყალიბებისკენ. წევრმა სახელმწიფოებმა კიდევ ერთხელ დააფიქსირეს მათი მხარდაჭერა ადამიანის უფლებების პატივისცემისა და დაცვის აუცილებლობის მიმართ და ხაზი გაუსვეს იძულებით გადაადგილებულ პირთა უფლებების დაცვისა და საკუთარ სახლებში მათი უსაფრთხო, ნებაყოფლობითი, ღირსეული და შეუფერხებელი დაბრუნების უფლების განხორციელების მნიშვნელობას, საერთაშორისო სამართლის თანახმად. აღინიშნა, რომ ლტოლვილთა და იძულებით გადაადგილებულ პირთა თემა რჩება ჟენევის საერთაშორისო მოლაპარაკებების არსებითი მნიშვნელობის საკითხად.

 

განცხადებაში გამოიხატა წუხილი, რომ რუსეთის მხრიდან შერიგების პროცესში მნიშვნელოვანი პროგრესის მიღწევის შესახებ თავდაპირველი დაპირებების მიუხედავად, ის არ ასრულებს აღნიშნულ დაპირებას, რაც განაპირობებს ჟენევის საერთაშორისო მოლაპარაკებების ფორმატში პროგრესის ნაკლებობას. წევრმა სახელმწიფოებმა ასევე მოუწოდეს დე ფაქტო ხელისუფლებებს, რომლებიც საქართველოს აფხაზეთისა და „სამხრეთ ოსეთის“ რეგიონებში ეფექტურ კონტროლს ახორციელებენ, ხელი შეუწყონ შესაბამისი ჰუმანიტარული და ადამიანის უფლებების სფეროებში მოღვაწე აქტორებისა და სხვა პირთათვის, აღნიშნულ რეგიონებში შეუფერხებელი დაშვების უზრუნველყოფას, მათ შორის რელიგიური მნიშვნელობის ადგილებზე. განცხადებაში ასევე აღინიშნა, რომ წევრი სახელმწიფოები რჩებიან საქართველოში კონფლიქტის მშვიდობიანი გადაჭრის მყარ მხარდამჭერებად და მოუწოდებენ ყველა მხარეს, გააძლიერონ თავისი ძალისხმევა ჟენევის საერთაშორისო მოლაპარაკებების ფარგლებში“, - აღნიშნავენ უწყებაში.

 

 

 

right_banner
არქივი
right_banner