logo_geo
eng_logo
მამუკა მდინარაძე: ჩვენ ყოველთვის დავიცავთ პატრიარქის, ეკლესიის და სახელმწიფოს ინტერესებს
- +

17 თებერვალი. 2017. 22:41


 

„უმცირესობის მიერ წამოსროლილი ეს მოთხოვნები პოლიტიკური სპეკულაცია და პოლიტიკური ქულების დაწერის მცდელობაა", - ამის შესახებ "ინტერპრესნიუსს" ფრაქცია „ქართული ოცნების" თავმჯდომარე მამუკა მდინარაძემ, საპარლამენტო უმცირესობის მიერ მთავარი პროკურორის გადაყენების მიზნით, ხელმოწერების შეგროვების დაწყების შეფასებისას განაცხადა.


როგორც მდინარაძემ აღნიშნა, დეკანოზის დაკავების საქმის, პოლიტიკური ქულების დაწერისთვის გამოყენების ცდუნება ძალიან დიდია.


„მისმა უწმინდესობამ გააკეთა განცხადება და განცხადება იყო ისეთი, როგორსაც ელოდა ყველა, სადაც გამოთქვა იმედი, რომ ეს მართლაც არანორმალური ვითარება დამშვიდდება. ძალიან მაღალია საზოგადოების და მათ შორის პირადად ჩვენი ინტერესიც ამ თემის აქტუალურობიდან გამომდინარე და პოლიტიკური ქულების დაწერისათვის ამ საკითხის გამოყენების ცდუნებაც ძალიან დიდია. ყოველი ჩვენგანი ვალდებულები ვართ, არ ავყვეთ სპეკულაციებს და გამოძიების შედეგებს დაველოდოთ, რადგან სიმართლე აბსოლუტურად ყველა შეკითხვას მოხსნის. ჩვენ ჩვენის მხრივ ყოველთვის დავიცავთ პატრიარქის, ეკლესიის და სახელმწიფოს ინტერესებს. რაც შეეხება კონკრეტულად უმცირესობის განცხადებას, ეს სწორედ პოლიტიკური მიზნებისთვის ამ ამბის გამოყენებაა, რაც ძალიან ცუდია. ჩვენ აუცილებლად უნდა დაველოდოთ გამოძიების შედეგს და ნებისმიერ საკითხზე, რომელიც ამ საქმესთან არის დაკავშირებული, ამ შედეგიდან გამომდინარე უნდა ვიმსჯელოთ", - განაცხადა მდინარაძემ.


მისივე თქმით, ის ერთ რამეში დაეთანხმება ნებისმიერ ადამიანს, რომ კითხვებზე პასუხი პროკურატურამ უნდა გასცეს და ეს გამოძიების შედეგებშიც უნდა აისახოს.


„გაუგებრობა ვისი პიარკამპანიის, ვისი წინასწარ დაანონსების, ვისი ნათქვამის თუ განცხადების ცოტათი გადაკეთების და ინტერპრეტირების შედეგად, ვისი სპეკულაციების შედეგად იქნა გამოწვეული, ამას საბოლოო ჯამში პოლიტიკური პასუხი გაეცემა, თუმცა, ამაზე უფრო მთავარია ის პასუხი და სიმართლე, რასაც გამოძიება დადებს. მანამდე ყველა განცხადება არის დამაზიანებელი საერთო ინტერესებისთვის, დამაზიანებელი გამოძიებისთვის და მიმაჩნია, რომ მათ მიერ წარმოსროლილი ეს მოთხოვნები პოლიტიკური სპეკულაცია, პოლიტიკური ქულების დაწერის მცდელობა და პოლიტიკური მიზანია, რაც ამ შემთხვევაში განსაკუთრებით მიუღებელია", - განაცხადა ფრაქცია "ქართული ოცნების" თავმჯდომარემ.




 

წყარო : wyaro
right_banner right_banner
არქივი
right_banner