logo_geo
eng_logo
„NATO-ს კვირეული კიდევ ერთი მნიშვნელოვანი ნაბიჯია ჩვენი საზოგადოებრივი აზრის კონსოლიდაციისათვის“
- +

17 აპრილი. 2018. 02:47

 

 

 

საქართველოს პრეზიდენტმა გიორგი მარგველაშვილმა NATO-ს დღეები გახსნა, რომელიც წელს NATO-ს დღეები მეთერთმეტედ, NATO-სა და ევროკავშირის შესახებ საინფორმაციო ცენტრის, საგარეო საქმეთა სამინისტროს, საქართველოში NATO-ს სამეკავშირეო ოფისისა და საქართველოში ბულგარეთის საელჩოს მხარდაჭერით იმართება.

 

გიორგი მარგველაშვილმა მიღებაზე მისულ სტუმრებს სიტყვით მიმართა და საქართველოს ნატოში ინტეგრაციისა და ამ გადაწყვეტილების მნიშვნელობაზე ისაუბრა.

 

პრეზიდენტის განცხადებით, NATO-ს წევრობა ქართველი ხალხის ნათელი არჩევანია. ამ გზაზე საქართველოს ყველა შესაბამისი სტრუქტურა, შეიარაღებული ძალები, თავდაცვის სამინისტრო, საგარეო საქმეთა სამინისტრო, ყველა სტრუქტურა სრული მობილიზაციითა და მიზნის მნიშვნელობის სრული გააზრებით მუშაობს.

 

გიორგი მარგველაშვილის განცხადებით, NATO-სთან მიმართებაში საქართველოს პასუხისმგებლიანი პოზიცია არაერთხელ დაფიქსირდა ჩვენი საგარეო პოლიტიკური ვექტორებით და გადაწყვეტილებებით.

 

საქართველოს მტკიცე მონაწილეობა NATO-ს მშვიდობისმყოფელ მისიებში მნიშვნელოვნადაა დაფასებული ჩვენი პარტნიორების მიერ. ნათლადაა დაფიქსირებული საქართველოს მზაობა ჩაერთოს NATO-ს ფორმატებში, სადაც საქართველოს როლი უაღრესად მნიშვნელოვანი და გასათვალისწინებელია.

 

„არაერთხელ აღგვინიშნავს, რომ საქართველოს წევრობის პარალელურად საქართველოს ჩართვა შავი ზღვის უსაფრთხოების დისკუსიებში ადეკვატურია და საქართველო მზად არის ამ თვალსაზრისითაც შეასრულოს ის პასუხისმგებლობა, რომელიც უფრო სტაბილურ და დაცულ რეგიონს და სამყაროს მოგვცემს.

 

წელს მართლაც მნიშვნელოვანი წელია, ჩვენ ველით და ვემზადებით კიდევ ერთი მნიშვნელოვანი სამიტისთვის და გვაქვს იმედი, რომ საქართველოს საკითხი იქნება შესაბამისად წარმოდგენილი. ჩვენ ვმუშაობთ ამ მიზნისათვის", - განაცხადა გიორგი მარგველაშვილმა.

 

პრეზიდენტის განცხადებით, მიმდინარეობს საინფორმაციო და პროპაგანდისტული ომი NATO-ს და ზოგადად, დასავლური ღირებულებების წინააღმდეგ, რომელიც ჩვენგან კიდევ უფრო აქტიურ ჩართულობას და პასუხის გაცემას მოითხოვს.

 

„ეს არის ის პოლიტიკური რეალობა, რომელშიც არა მარტო საქართველოა, არამედ NATO-ს წევრი ქვეყნებიც. ჩვენ ყველა ვერთიანდებით იმ მიზნის ირგვლივ, რომ საზოგადოება, ჩვენი მოსახლეობა მაქსიმალურად ინფორმირებულები გავხადოთ იმ სიმართლის, ჭეშმარიტების თაობაზე, რომელსაც ჩვენ ამ ღირებულებებით გაერთიანებული ქართველებიც და NATO-ს ჩვენი პარტნიორებიც ვემსახურებით", - აღნიშნა გიორგი მარგველაშვილმა.

 

პრეზიდენტმა მადლობა გადაუხადა კვირეულის ორგანიზატორებს და იმედი გამოთქვა, რომ ეს კიდევ ერთი მნიშვნელოვანი ნაბიჯი იქნება ჩვენი საზოგადოების აზრის კონსოლიდაციისა და ამ მიმართულებით ჩვენი მზაობის კიდევ უფრო განმტკიცების საქმეში.

 

NATO-ს დღეებისადმი მიძღვნილ ღონისძიებას საქართველოს პარლამენტის თავმჯდომარე, მინისტრთა კაბინეტის წევრები, საკანონმდებლო და აღმასრულებელი ხელისუფლების, ასევე დიპლომატიური კორპუსის წარმომადგენლები ესწრებოდნენ.

 

 

 

right_banner right_banner
არქივი
right_banner