logo_geo
eng_logo
კორონავირუსის 15 ახალი შემთხვევიდან ცხრა სვანეთში მოგზაურობას უკავშირდება
- +

15 აგვისტო. 2020. 12:04

 

 

თბილისის ინფექციური საავადმყოფოს სამედიცონო დირექტორის, მარინა ეზუგბაიას განცხადებით, კორონავირუსის 15 ახალი შემთხვევიდან ცხრა სვანეთში მოგზაურობას უკავშირდება, ოთხი კი დადასტურებულ შემთხვევასთან კონტაქტია.

 

მისივე თქმით, კიდევ ერთი ახალი ინფიცირებული სატვირთო ავტომობილის მძღოლია, ერთის ინფიცირების წყარო კი, უცნობია.

 

„ცხრა დადასტურებული შემთხვევა არის მოგზაურობა ეპიდაფეთქების ზონაში, სვანეთში. ოთხი შემთხვევა არის დადასტურებულ შემთხვევასთან კონტაქტი, ერთი გახლავთ შემოტანილი და ის სატვირთო ავტომობილის მძღოლია. ერთ შემთხვევაზე გრძელდება ეპიდკვლევა კონტაქტების მოძიებისა და წყაროს დადგენის თვალსაზრისით“, - განაცხადა მარინა ეზუგბაიამ.

 

მისივე თქმით, ამ დროისთვის კოვიდ-ცენტრებში 216 ინფიცირებული რჩება, რომელთაგან ექვსის მდგომარეობა კრიტიკულია.

 

„დღევანდელ დღეს კოვიდ-ცენტრებში 216 პაციენტი მკურნალობს. მათი განაწილება სიმძიმის მიხედვით ასეთი გახლავთ – გუშინ გვყავდა შვიდი კრიტიკული პაციენტი, ერთი პაციენტის მდგომარეობა გაუმჯობესდა და ის განიხილება როგორც მძიმე პაციენტი. ამიტომ, კრიტიკული პაციენტების რაოდენობა არის ექვსი. მძიმე პაციენტების რაოდენობა არის 19. ამ პაციენტების მდგომარეობა სტაბილურია და მათთან დაავადების პროგრესირება არ შეინიშნება.

 

ჩვენი ცენტრის მონაცემებს რაც შეეხება, გუშინ ჩვენ გვყავდა 31 დადასტურებული პაციენტი, ახალი პაციენტი ჩვენთან არ მოთავსებულა, გამოჯანმრთელდა ორი და დილის მონაცემებით 29 დადასტურებული პაციენტი გვყავს. ასევე, სამი მძიმე პაციენტი გვყავდა, მათგან ერთი აღარ განიხილება როგორც მძიმე და მისი მდგომარეობა უკვე საშუალო სიმძიმის გახლავთ. ამ ეტაპზე კლინიკაში გვრჩება ორი მძიმე პაციენტი, მათი მდგომარეობა სტაბილურია. დანარჩენი პაციენტების მდგომარეობა საშუალო და მსუბუქი სიმძიმისაა“, – განაცხადა ეზუგბაიამ.

 

თბილისის ინფექციური საავადმყოფოს სამედიცონო დირექტორმა კომენტარი გააკეთა სვანეთსა და ყაზბეგში არსებულ ეპიდვითარებაზეც.

 

„გუშინდელი მონაცემების მერე თითქოს მატება არ არის ყაზბეგში, რა მონაცემებიც მოგახსენეთ გუშინ, იმის მერე ჯერჯერობით დღევანდელი ქეისებიდან გამომდინარე, არ ჩანს და დღის განმავლობაში გამოჩნდება ალბათ რადგან კვლევა გრძელდება როგორც სვანეთში, ისე – ყაზბეგში. ეს ცოტა ხანგრძლივი პროცესია“, – განაცხადა ეზუგბაიამ.

 

 

 

 

right_banner
არქივი
right_banner