logo_geo
eng_logo
პეკინის გამზირის შემდეგ, ზონალურ-საათობრივი პარკირების ამოქმედება ვაჟა-ფშაველასა და ყაზბეგის გამზირებზე იგეგმება
- +

16 სექტემბერი. 2020. 11:46

 

პეკინის გამზირის შემდეგ, ზონალურ-საათობრივი პარკირების ამოქმედება ვაჟა-ფშაველასა და ყაზბეგის გამზირებზე იგეგმება. ამის შესახებ თბილისის მერიის სხდომაზე დედაქალაქის მერმა, კახა კალაძემ განაცხადა.

 

„საბურთალოს რაიონში მხოლოდ პეკინის გამზირით არ შემოვიფარგლებით. შემდეგი იქნება ვაჟა-ფშაველას და ყაზბეგის გამზირები. საინფორმაციო ჯიხურები აქაც მოვამზადოთ, რათა ადამიანებს ჰქონდეთ შესაძლებლობა, მიიღონ სრულყოფილი ინფორმაცია ამ სიახლესთან დაკავშრებით.

 

ადგილობრივმა მოსახლეობამ საკუთარი ავტომობილები უნდა დაარეგისტრიროს ჩვენს პორტალზე. ამაში მერიის თანამშრომლები დაეხმარებიან და საცხოვრებლიდან 100 მეტრის რადიუსში მათთვის ავტომობილის პარკირება იქნება უფასო. ასევე, პარკირება უფასო იქნება ელექტრომობილებისთვის, შშმ პირებისთვის, გამოიყოფა შესაბამისი ადგილები „ა“ კატეგორიის ტაქსებისთვის, დანარჩენი ადამიანებისთვის კი პირველი 15 წუთი უფასო იქნება, შემდეგ კი 1 საათის ღირებულება იქნება ლარი“, – განაცხადა კახა კალაძემ.

 

გარდა ამისა, თბილისის მერმა მის მოადგილეს, ირაკლი ხმალაძეს დაავალა, რომ ანალოგიური პროექტის განხორციელებისთვის მოსამზადებელი სამუშაოები ვაკის რაიონშიც დაიწყოს.

 

„ეს იქნება აბაშიძე, ფალიაშვილი, ჭავჭავაძე და მკვეთი ქუჩები. ზოგადად, ეტაპობრივად მთელი ქალაქის მასშტაბით დაიგეგმება ზონალურ-საათობრივი პარკირების პროექტის განხორციელება. პარკირების საფასური, რაიონებიდან გამომდინარე, იქნება სხვადასხვა“, – განაცხადა კალაძემ.

 

 

right_banner
არქივი
right_banner