logo_geo
eng_logo
„მიუხედავად იმისა, რომ ივანიშვილი და სააკაშვილი არჩევნებში არ მონაწილეობენ, არჩევანი ფაქტობრივად მათ შორის კეთდება“
- +

27 ნოემბერი. 2018. 20:54

 

 

„მიუხედავად იმისა, რომ ივანიშვილი და სააკაშვილი არჩევნებში კენჭს არ იყრიან, არჩევანი ფაქტობრივად მათ შორის კეთდება“ – საქართველოს საპრეზიდენტო არჩევნების მეორე ტურთან დაკავშირებით „Euronews“-ი სტატიას აქვეყნებს.

 

სტატიის თანახმად, პრეზიდენტობის ერთ-ერთი კანდიდატი, გრიგოლ ვაშაძე ოპოზიციური პარტია „ნაციონალური მოძრაობის“ წარდგენილია, აღნიშნული პარტია კი ყოფილი პრეზიდენტის, მიხეილ სააკაშვილი დაფუძნებულია, რომელიც ძალაუფლების ბოროტად გამოყენების ბრალდებით დაუსწრებლად არის გასამართლებული.

 

სტატიის ავტორი წერს, რომ არჩევნებში ვაშაძის გამარჯვების შემთხვევაში მიხეილ სააკაშვილი სავარაუდოდ საქართველოში დაბრუნებას შეეცდება.

 

„ვაშაძე დიდი ალბათობით სააკაშვილი პოლიტიკას გააგრძელებს, NATO-სა და ევროკავშირისკენ კურსს, ასევე შეიწყალებს მოქმედი მთავრობის მიერ გასამართლებულ პირებს, ასევე სააკაშვილს. ეს მისთვის რისკის უდიდესი ელემენტია“, – ციტირებს სტატიის ავტორი საქართველოს საკითხებში ექსპერტს, მაქს ფრასს.

 

„Euronews“-ის სტატიაში აღნიშნულია, რომ გრიგოლ ვაშაძე საქართველოს ყოფილი საგარეო საქმეთა მინისტრია, ამასთანავე საბჭოთა კაშირის დროს მოსკოვში დიპლომატიური კარიერა ჰქონდა, რაც არ ნიშნავს, რომ ვაშაძე პრორუსული ორიენტაციისაა, თუმცა მისი კავშირები ქართველების ნაწილს აღაშფოთებს.

 

სტატიის მიხედვით, არჩევნებში ფავორიტი ასევე ყოფილი საგარეო საქმეთა მინისტრი, სალომე ზურაბიშვილია, რომელიც სავარაუდოდ გაიმარჯვებს.

 

ზურაბიშვილის განცხადებამ, რომ 2008 წელს საქართველომ დაიწყო ომი რუსეთთან, უთანხმოება გამოიწვია.

 

„მისთვის დამახასიათებელია მკვეთრი და უხეში გამონათქვამები. ზურაბიშვილისთვის დამახასიათებელია კომენტარები, რომელიც ყოველთვის არ შეესაბამება მთავრობის პოლიტიკას. ზურაბიშვილი სავარაუდოდ მოიგებს და შესაძლოა, გახდეს უფრო დამოუკიდებელი, ვიდრე მოქმედი პრეზიდენტი მარგველაშვილია”, – აცხადებს მაქს ფრასი.

 

„Euronews“-ი ყურადღებას ამახვილებს არჩევნების შემდგომ საქართველოს საგარეო კურსის მიმართულებაზე.

 

სტატიის თანახმად, მიუხედავად იმისა, რომ ევროკავშირის პერიფერიაზე სხვა ქვეყნები ბრიუსელსა და მოსკოვს შორის გავლენისთვის ბრძოლის ადგილია, საქართველოს ვითარება განსხვავებულია.

 

საქართველოს ევროკავშირთან ასოცირების შეთანხმება აქვს, თუმცა სრულ წევრობაზე ოფიციალური თხოვნა ჯერ არ წარუდგენია.

 

„ნაკლებად სავარაუდოა, რომ ვინც არ უნდა გაიმარჯვოს არჩევნებში, საქართველო NATO-სკენ და ევროკაშირისკენ კურსს შეცვლის”, – აღნიშნულია სტატიაში.

 

სტატიაში მოყვანილია ექსპერტ, მაქს ფრასის პროგნოზი არჩევნების შემდგომ პერიოდში. ფრასი აცხადებს, რომ ვაშაძის გამარჯვება და სააკაშვილის სავარაუდო დაბრუნება, უფრო მეტ არასტაბილურობას გამოიწვევს, რადგან მას ბევრი ოპონენტი ჰყავს, ზურაბიშვილის გამარჯვების შემთხვევაში კი ვითარება სავარაუდოდ უფრო სწრაფად დასტაბილურდება.

 

 

right_banner right_banner
არქივი
right_banner
×