logo_geo
eng_logo
ზურაბ ქადაგიძე: შეიძლება, 80-იანი წლების სტიქიური უბედურებაც კი ხელისუფლებას დააბრალონ...
- +

6 მაისი. 2017. 20:54




თბილისის საკრებულოს დეპუტატმა ზურაბ ქადაგიძემ „რეპორტიორთან" საუბრისას ლისის ტბის მიმდებარედ დამწვარ ხეებთან დაკავშირებით ისაუბრა და აღნიშნა, რომ თვითმმართველობის არჩევნები ახლოვდება და მსგავსი განცხადებები მოსალოდნელია.


ქადაგიძემ ასევე ისაუბრა საკონსტიტუციო კომისიის მუშაობაზე.

 

 

- ლისის ტბის მიმდებარედ დამწვარ ხეებთან დაკავშირებით გავრცელებულ ინფორმაციაზე რა შეგიძლიათ თქვათ? შეესაბამება თუ არა სიმართლეს გავრცელებული ინფორმაცია?


- „ახალი საქართველო" რაღაც ახალ ინტრიგნულ, პროვოკაციულ მიდგომებს გვთავაზობს.


ეს გახლავთ წლების წინ გაჩენილი ხანძრის შედეგად დაზიანებული ტერიტორია. ამ საკითხზე მერიის ოფიციალურმა პირებმა გააკეთეს განცხადება და აღნიშნეს, რომ ეს ტერიტორია ერთ-ერთ კერძო კომპანიას ეკუთვნის. რაც შეეხება იმას, რომ მერიის მხრიდან არ ხდება რეაგირება, ეს არის აბსურდი და ტყუილი. დავით ნარმანიას ერთ-ერთი მთავარი პრიორიტეტი სწორედ გამწვანებაა, რომელსაც მოწმობს ის 650 000-ზე მეტი დარგული ხე.


ზოგადად, თვითმმართველობის არჩევნები გვიახლოვდება და მსგავს განცხადებას ჩვენ ბევრს ვნახავთ. შეიძლება, 80-იანი წლების სტიქიური უბედურებაც კი ხელისუფლებას დააბრალონ. ეს არის მათი მეთოდი, რამდენად შეძლებენ საზოგადოებაში დუღილის ტემპერატურის აწევას.

 

- გარევაჭრობის აკრძალვასთან დაკავშირებით რას ფიქრობთ?



- ჩვენ თუ გვაქვს ცივილიზებულ ქვეყანასა და ევროპულ სტანდარტებზე პრეტენზია, აუცილებელია გქვონდეს გარკვეული სახის ორგანიზება მოწყობისა და ინფრასტრუქტურული თვალსაზრისით. მსოფლიოში კონკრეტულ იურიდიულ საფუძველზე შექმნილი ბაზრობები და ბაზრები არსებობს, აქედან გამომდინარე, სახელმწიფოს პოზიციას 100%-ით ვამართლებ, უნდა იყოს ასეთი მიდგომა.


რაც შეეხება მორალურ ფაქტორებს, ყველა ვთანხმდებით ერთ საკითხზე, ადამიანს რომ არ უჭირდეს, ნამდვილად არ დადგებოდა ქუჩაში და ამა თუ იმ პროდუქციით არ ივაჭრებდა. თუმცა, თბილისის მთავრობის ძალისხმევით ყველა ბაზრობის მეპატრონესთან მოხდა კოორდინაცია და შეთანხმება, 6 თვის განმავლობაში ეს ადამიანები გადასახადს არ გადაიხდიან.


ერთს გეტყვით, როდესაც მეტრო „მარჯანიშვილის" მიმდებარე ტერიტორიაზე დაიწყო ე.წ. მოსუფთავება, ძალიან ბევრი მოქალაქე ღიად აცხადებდა, რომ სახელმწიფოს მხრიდან ეს ძალიან კარგი ნაბიჯი იყო. არსებობს კიდევ ერთი დიდი პრობლემა, რაც ანტისანიტარიასა და ეკოლოგიას უკავშირდება.


გარევაჭრობის პრობლემის გადაჭრა უმტკივნეულოდ, ზედმეტი ბატალიების გარეშე, მოლაპარაკების გზით მოხდა.


რაოდენ სამწუხაროც არ უნდა იყოს, მაინც გამოვლენ ადამიანები, რომლებიც პოპულისტური ლოზუნგებით იტყვიან, რომ საშინელებას ჩადის სახელმწიფო. სახელმწიფო აკეთებს იმას, რასაც უნდა აკეთებდეს.


- მოსახლეობა ე.წ. ელიავას ბაზრობის ტერიტორიის რეკრეაციულ ზონად გადაკეთებას ითხოვს... რას ფიქრობთ ამ იდეაზე?



- პირველ რიგში, განსასაზღვრია, არის თუ არა ეს ტერიტორია კერძო საკუთრება, გასარკვევია, რამდენად ჩაჯდება ესა თუ ის პროექტი სახელმწიფო განვითარების გეგმაში. ეს კომპლექსური საკითხია.


წლების განმავლობაში თბილისში ჰავის თვალსაზრისით აქ საუკეთესო მდგომარეობა გახლდათ, თუმცა დღეს ეს პრობლემური საკითხია, ამიტომ მივესალმები ყველგან, სადაც შესაძლებელია, რეკრეაციული ზონის გაკეთებას.


ამ საკითხში გასათვალისინებელია კერძო სუბიექტი, მოსახლეობა, კონკრეტული გეგმა და მიმართულება თუ რამდენად ჯდება ამა თუ იმ სტანდარტში. ამ ყველაფერს ასე ერთი ხელის მოსმით ვერ გადავწყვეტთ, კომპლექსურად უნდა მივუდგეთ.


- დიდგორის დღის უქმედ გამოცხადებასთან დაკავშირებით როგორია თქვენი შეხედულება? გათვალისწინებულ უნდა იქნეს თუ არა თურქეთის საელჩოს თხოვნა?

 

 

- თუკი არსებობდა ასეთი ფაქტი, თუკი რეალურად ვინმემ მოითხოვა, რომ დიდგორობა არ იყოს უქმე დღე, მაშინ დაველოდოთ თურქეთის ოფიციალურ განმარტებას, რას ნიშნავს ეს ყველაფერი.


რაც შეეხება უქმე დღედ გამოცხადებას, დიდგორობას მე ჩემს მეგობრებთან ერთად, შეძლებისდაგვარად ყოველ წელს აღვნიშნავ ხოლმე. გამოვაცხადებთ თუ არა დიდგორობას უქმე დღედ, ეს გემოვნების საკითხია. საკმაოდ ბევრი დღეა, დიდი დღესასწაულები არსებობს, რომლებსაც საზოგადოება უქმედ იყენებს. ამ თემით მანიპულირება არ შეიძლება. არასწორი კუთხით არ უნდა წავიყვანოთ თემა.


დიდგორობა არის ერთ-ერთი მთავარი თარიღი საქართველოს ისტორიაში. ეს არის უდიდესი დღესასწაული, რომელსაც თითოეული ქართველი აღნიშნავს და გრძნობს ამ გავლენას. აქედან გამომდინარე, ამ თემის გაიაფებაც არ შეიძლება ასეთ დონეზე. დიდგორობის პრიმიტიულ საზრისებამდე დაყვანა არ შეიძლება.


თუკი არსებობს ასეთი ფაქტი, მაშინ მე, როგორც რიგითი მოქალაქე, ველოდები ოფიციალურ განმარტებას. თუ არ არსებობს ასეთი რამ, მაშინ არ შეიძლება თემით აპელირება. ასეთი დიდი დღესასწაულითა და ასეთი დიდი თარიღით ვაჭრობა არ შეიძლება.


- საკონსტიტუციო კომისიამ კანონპროექტზე მუშაობა დაასრულა, იცვლება პრეზიდენტის არჩევის წესი, როგორ ფიქრობთ, მსგავსი ცვლილება სწორი გადაწყვეტილებაა?



- ეს ერთ-ერთი ყველაზე კარგი და წინგადადგმული ნაბიჯია, ამაზე თვეების განმავლობაში მიდიოდა მსჯელობა, ბევრი ჯგუფი მუშაობდა.


თუკი ჩვენ საპარლამენტო რესპუბლიკისკენ მივდივართ, მაშინ იმ ჩარჩოში უნდა მოვექცეთ, რასაც საპარლამენტო რესპუბლიკა მოითხოვს.


ირაკლი კობახიძემ ისაუბრა, რომ ჩვენ ვვითარდებით ამ კუთხით. ჩვენ თუ გვინდა, რომ რიგი პოლიტიკოსების პოპულისტური გამოსვლების გამო საზოგადოებას განვითარების საშუალება არ მივცეთ, მაშინ მოდით, ამაზე შევთანხმდეთ, მაგრამ, გასათვალისწინებელია ერთი რამ, საზოგადოების უდიდესმა ნაწილმა სწორედ „ქართულ ოცნებას" მიანიჭა ის უფლებამოსილება, რასაც ახლა მმართველი პოლიტიკური პარტია ქვეყანაში ახორციელებს.


- უქმდება მაჟორიტარული სისტემა...


- ქვეყნის განვითარებისთვის ეს არის უფრო  დემოკრატიული და წინ გადადგმული ნაბიჯი. სწორედ ეს გახლდათ „ქართული ოცნების" წინასაარჩევნო დაპირება. მმართველ ძალას გამოარჩევს ის, რომ ნებისმიერი გადაწყვეტილების მიღება ხდება ეტაპობრივად და არა ერთი ხელის მოსმით.


- შესაძლებელია, კონსტიტუციაში ჩაიწეროს დეფინიცია, რომ ოჯახი ქალისა და მამაკაცის ერთობაა, ამ ინიციატივას რამდენად იზიარებთ?



- ოჯახი ქალისა და მამაკაცის ურთიერთობაა, მაგრამ ვინმეს თუ სურს, ოფიციალურ და არაოფიციალურ ურთიერთობაში ყოფნა, მათი ცხოვრება და მათი არჩევანია.


ჩვენთან ადამიანების ურთიერთობა არ იკრძალება და ამ ურთიერთობაში სახელმწიფო არ ერევა. პირიქით, თუ ვინმე რაიმე სახით ჩაერევა, ამისთვის კანონია შექმნილი და ის ადამიანი მკაცრად დაისჯება.


ქართული ოჯახი არის ქვეყნის ქვაკუთხედი. დღეს საქართველო რომ არსებობს, ქართული ტრადიციული ოჯახის დამსახურებაა. 


 

right_banner
არქივი
right_banner