reportiori.ge - გედევან ფოფხაძე: გაფუჭებულის გამოსწორება ხანდახან შეუძლებელია. გირგვლიანი მოკლეს და ვეღარ გაცოცხლდება
ჩვენ შესახებ პარტნიორები ქარტია ბმულები რეკლამა კონტაქტი
კვირა, 15 სექტემბერი, 2019. 14:14
ინტერვიუ
გედევან ფოფხაძე: გაფუჭებულის გამოსწორება ხანდახან შეუძლებელია. გირგვლიანი მოკლეს და ვეღარ გაცოცხლდება
ავტორი: ანა ნოდია
04 ივნისი, 2015. 18:42


„რეპორტიორის" შეკითხვებს საპარლამენტო უმრავლესობის წევრი, იურისტი გედევან ფოფხაძე პასუხობს:


- რას ნიშნავს თქვენი ხელისუფლების დაპირება - სამართლიანობის აღდგენა?

 

- სამართლიანობასთან მიმართებაში ყოველთვის მქონდა ჩემი პოზიცია. კლასიკური გაგებით, სამართლიანობის აღდგენა ძალიან იდეალისტური შეფასებაა. შეიძლება, ვინმეს ჰქონდა ილუზია - რაც „ნაციონალური მოძრაობის" დროს გაფუჭდა, ყველაფერი გამოსწორდებოდა. სამწუხაროდ, გაფუჭებულის გამოსწორება ხანდახან შეუძლებელია. გირგვლიანი მოკლეს და ვეღარ გაცოცხლდება. დროს აქვს თავისი კანონები, რომელსაც ვერ შეცვლი. სამართლიანობის აღდგენა, ვისაც გვესმის წმინდა სამართლებრივი თვალსაზრისით, ეს პროცესი მეტ-ნაკლებად დაწყებულია. თუმცა, სრული მოცულობით ამის რეალიზაცია შეუძლებელია. ამიტომ არის კანონმდებლობაში ხანდაზმულობაც, დროის მსვლელობასთან ერთად პირველადი მდგომარეობის აღდგენა ან რთულია, ან შეუძლებელი. 2012 წელს მოხდა პოლიტიკური ძალის ადეკვატური შეფასება, რომელიც უსამართლოდ ექცეოდა საზოგადოებას. ეს იყო სამართლიანი პროცესი. უსამართლობა, რომელიც ქვეყანაში ხდებოდა, მნიშვნელოვნად აღმოიფხვრა. დღეს არავის იჭერენ, არ ათმევენ ქონებას, აღარ არის პოლიტიკური ტერორი, მასმედია თავისუფალია და არცერთ ტელევიზიას არ ემუქრება იმის საფრთხე, რომ ვინმე დაარბევს იმის გამო, რომ მათი სარედაქციო პოლიტიკა არ მოსწონს. ეს არის უსამართლობის სამართლიანობით შეცვლა. ჩვენ ვდგამთ ნაბიჯებს და ვცდილობთ, სინდისთან და მსოფლმხედველობასთან ვიყოთ მართლები. გამოვასწოროთ ის უსამართლობა, რაც სააკაშვილის დროს მოხდა, მაგრამ ყველაფრის გამოსწორება შეუძლებლად მიმაჩნია.


- გამოუძიებელი საქმეები - რობაქიძის, გირგვლიანის, აფრასიძეების და სხვა მრავალი... არცერთი საქმე არ არის ბოლომდე მისული. რას გულისხმობდით დამნაშავეების დასჯაში?

 

- კლასიკური დანაშაულებრივი რეჟიმები რომ ავიღოთ, მაგალითად, ფაშისტური გერმანია, ნურავის ექნება პრეტენზია, რომ ჰიტლერი იყო მხოლოდ დამნაშავე და ის ხალხი, რომელიც „ჰაილ ჰიტლერს" ყვიროდა, არაფერ შუაში იყო. რა თქმა უნდა სისტემა შექმნა ყველამ, დაწყებული რიგითი თანამშრომლით, დამთავრებული ადოლფ ჰიტლერით. ნიურნბერგის პროცესზე რეჟიმი კი გასამართლდა, მაგრამ ყველა სეგმენტი, ყველა რგოლი ვერ გასამართლდებოდა.


ქართულ რეალობაშიც არის იგივე. სისტემური შემოქმედების ძირითადი დამნაშავეები ან არიან დევნილები, ან იმყოფებიან სასჯელაღსრულების დაწესებულებებში და მათ მიმართ ხორციელდება სამართლიანი მართლმსაჯულება. ჩვენ მივდივართ სამართლიანი გზით. ყველას ვთავაზობთ სამართლიან მართლმსაჯულებას.


ვიღაცისთვის მარტივი იყო ამ ხალხის ლინჩის წესით გასამართლება, ქუჩაში გამოყვანა და თავში კომბლის ჩარტყმა, მაგრამ ეს ნიშნავდა იმას, რომ ჩვენ გადავიქცეოდით „ნაციონალურ მოძრაობად". ჩვენ გავხდებოდით მათზე უფრო უარესები. მიმაჩნია, რომ მორალურად სწორი კურსი გვაქვს. შინაგანად, მეც ბევრი აგრესია მაქვს, მაგრამ მიმაჩნია, რომ უმჯობესია, ამ აგრესიას ჩემში ვებრძოლო, ვიდრე  სხვა ადამიანების აგრესია წავახალისო იმ რიტორიკით, რაც შეიძლება შევთავაზო ადამიანებს. ვითამაშო მათ ემოციებზე, ვიძახო, რომ ბოლომდე უნდა გავუსწორდეთ ნაციონალებს, გავანადგუროთ... ეს არასწორი რიტორიკაა. ჩვენ ეს ძალა პოლიტიკური პასუხისმგებლობის წინაშე დავაყენეთ და სისტემური დანაშაულის შემქმნელების მიმართ მიმდინარეობს სამართლებრივი დევნა. ეს არის ის გზა, რომელიც ჩვენ ავირჩიეთ. ხაზგასმით ვიტყვი, თუ შენ არ გქონდა მართლმსაჯულება, ეს არ გაძლევს უფლებას, მართლმსაჯულება წაართვა იმ ადამიანებს, რომლებიც თუნდაც ჯალათებად მიგაჩნია.


დღეს მოსამართლეს ვერავინ აიძულებს,  ჩვენთვის სასურველი გადაწყვეტილება მიიღოს. გვახსოვს, ნაციონალების დროს როგორი მართლმსაჯულება იყო.


მიმაჩნია, რომ პროკურატურა საკმაოდ კარგად მუშაობს. ერთი მხრივ, პროკურატურას ჩვენი თანამოაზრეები, ჩვენი თანაგუნდელები უკუჟინებენ, რატომ უფრო თანმიმდევრულები არ ხართო, მეორე მხრივ, ოპონენტები უკიჟინებენ, პოლიტიზებულები ხართო. თუ პროკურატურა არ იქნება დაცული ამ სიტუაციაში და არ იგრძნობს, რომ მას აქვს საშუალება, სრულფასოვნად შეასრულოს ფუნქცია, ამითაც დავზარალდებით. შეშინებული ან დაგეშილი პროკურატურა ორივე ერთნაირად საშიშია. მართლმსაჯულება შევთავაზეთ ოპონენტებს. დამნაშავე დაისჯება სამართლიანი გზებით!

 

- საარჩევნო დაპირებებს შეგახსენებთ. სამუშაო ადგილები ყველას - ეს იყო თქვენი წინასაარჩევნო დაპირება ბორჯომის რაიონში. რამდენად შეასრულეთ?


- სამწუხაროდ, სამუშაო ადგილები დღეს ყველაზე დიდი პრობლემაა. სახელმწიფოს ძალიან უჭირს ამ პრობლემასთან ჭიდილი. გლობალური პრობლემების გათვალისწინებით. განვითარებულმა ქვეყნებმაც ბევრი იზარალეს. ჩვენ ხელოვნურად ვერ შევქმნით ბიზნესებს. მაგალითად, აქტიურად ვითარდება „IDS ბორჯომი". ამ მხრივ ბევრი რამ გაკეთდა ხელისუფლების მხრიდან, არის ქარხანა, რომელსაც სახელმწიფო ყველანაირად ეხმარებოდა, რომ ახალი ბაზრები აეთვისებინა, შეეტანა თავისი პროდუქცია, მაგრამ ამაზეც პრობლემა შეიქმნა. დიდი მოთხოვნა იყო „ბორჯომის" წყალზე, უდიდეს ნიშნულზე იყო წარმოება მისული, მაგრამ ამას მოჰყვა ის პროცესები, რაც დაიწყო. აღმოსავლეთ უკრაინაში პროდუქცია საერთოდ ვერ ვრცელდება და სადაც ვრცელდება, იქაც ფასების ცვალებადობის გამო პრობლემები შეიქმნა. მესმის, რომ ამ ფორმით თავის მართლება საზოგადოებისთვის საკმარისი არ არის და ის ელოდება ჩვენი მხრიდან უფრო ეფექტურ ღონისძიებებს. თუმცა, მეორე მხრივ, ის პროცესი, რაც დავიწყეთ  ბიზნესის გათავისუფლების კუთხით, თავის შედეგს მაინც გამოიღებს. მესმის, რომ დღეს ბევრ ადამიანს უჭირს, არ აქვს სამსახური, თუმცა, მოიხსნა ის წინააღმდეგობები, რაც გრძელვადიან პროცესში, ამ ადამიანებს შეუქმნის უკეთესი ცხოვრების პირობებს.


- წინასაარჩევნოდ ტარიფების დაწევაზე საუბრობდით, თუმცა, რეალურად გადასახადები არ შემცირებულა...

 

- კომუნალური გადასახადების თემა რთული საკითხია, ეს მარტო სახელმწიფოს რეგულაციაში არ არის. რეალურად კომუნალურ მომსახურებას ახორციელებენ კერძო მეწარმეები, რომლებიც არ არიან სახელმწიფო სუბიექტები. მათ შეუძლიათ, სამართლებრივად დაიცვან ის განაკვეთები, რომელიც უკვე დადგენილია მარეგულირებელი კომპანიის მიერ. გარკვეული მონოპოლია კომუნალურ გადასახადებზე არსებობს და ამას ჩვენ ვერ გავაუქმებთ, რადგან არის ერთი კომპანი,ა რომელიც აწვდის ელექტროენერგიას მოსახლეობას. სწორედ ამიტომ არის საჭირო ტარიფის დადგენის პროცესში სახელმწიფოს მონაწილეობა. ვალუტის კურსის ცვალებადობასთან დაკავშირებით, იმას მაინც ვახერხებთ, რომ კომუნალური გადასახადების ფასმა არ აიწიოს და ეს დავარეგულიროთ. ჩვენ კარგად გვახსოვს, „ნაციონალური მოძრაობა" როგორ ზრდიდა ფასებს. ძალიან იოლია ფასის გაზრდა, თუ საზოგადოების აზრს არ ითვალისწინებ და გინდა, უფრო მეტი წაართვა მოსახლეობას. შემცირება გაცილებით რთულია, რადგან პირდაპირ ეჯახები კომერციულ სტრუქტურებს.



 

ხათუნა ლაგაზიძის პრესკონფერენცია
13.02.2016
კონსტანტინე გამსახურდიას პრესკონფერენცია
13.02.2016
''ერეკლე მეორის საზოგადოების'' პრესკონფერენცია
13.02.2016
ლევან გოგიჩაიშვილის პრესკონფერენცია
11.02.2016
ნინო მაჭავარიანის, რუსუდან კვალიაშვილის და ირმა მახათაძის პრესკონფერენცია
11.02.2016
დემურ გიორხელიძის პრესკონფერენცია
11.02.2016
პეტრე მამრაძის პრესკონფერენცია
11.02.2016
ომარ ნიშნიანიძის პრესკონფერენცია
11.02.2016
დიმიტრი ლორთქიფანიძის პრესკონფერენცია
10.02.2016
მანანა ნაჭყებიას პრესკონფერენცია
10.02.2016