პოზნანის „ლეხის“ და საქართველოს ნაკრების ფეხბურთელმა ნიკა კვეკვესკირმა პოლონურ კლუბს ინტერვიუ მისცა, რომელიც მთლიანად ევრო 2024-ზე გასვლას და მის მიერ შესრულებულ გადამწყვეტ პენალტს შეეხო.
„ძნელია სიტყვებით გადმოსცე, რამდენს ნიშნავს ჩემთვის და მთელი საქართველოსთვის ეს გამარჯვება. ჩვენ პირველად გავედით ევროპის ჩემპიონატზე. ყოველდღე, ჩვენი საქციელით ვამტკიცებთ, რომ ევროპის ნაწილი ვართ, რომ მას ვეკუთვნით, ამიტომ ეს წარმატებაც დიდი ნაბიჯია ამ მიმართულებით ჩემი ქვეყნისთვის. საოცარი და ამაღელვებელი გრძნობაა.
როცა ბავშვი ხარ, ოცნებობ და წარმოიდგენ, რომ შენი გუნდისთვის გადამწყვეტი გოლი გაიტანე. ეს არის ზუსტად ასეთი ემოცია. გამიმართლა, რომ ჩემი პენალტი ბოლო იყო. დიდი პასუხისმგებლობაა. რა თქმა უნდა, სტრესის ქვეშ ვიყავი, რადგან იმ წამებში მთელი ქვეყნის ზურგით ტარება მომიწია. მით უმეტეს, რომ ვიცი, რამდენს ნიშნავს ეს ჩემი ქვეყნისთვის, მაგრამ ასევე ჩემთვის. ვცდილობდი, დავმშვიდებულიყავი, სუნთქვა შემეკრა, რათა ჩემს სტილში დამერტყა, როგორც ყოველთვის ვასრულებდი. მაგრამ დანამდვილებით შემიძლია ვთქვა, რომ სტრესს ვგრძნობდი.
არ უნდა დაგვავიწყდეს, როგორ გავედით პლეი-ოფში და ეს ერთა ლიგის წყალობით გავაკეთეთ. ჯგუფურ ეტაპზე პრაქტიკულად ყველა მატჩში ვითამაშე. მნიშვნელოვანი ადამიანი ვარ გუნდში, გუნდის ვიცე-კაპიტანი ვარ, მაგრამ სამწუხაროდ ამ პლეი-ოფის თამაშებში სასტარტო შემადგენლობაში არ ვიყავი. მომიწია ამის მიღება, რადგან ვიცოდი, რამდენად მნიშვნელოვანი იყო ეს მატჩი ჩემი ქვეყნისთვის. ვცდილობდი, გუნდს მაქსიმალურად დავხმარებოდი, როგორც მოედანზე, ისე მის გარეთ. ეს სრულიად ნორმალურია. ველოდი, რომ სათადარიგოთა სკამზე დავიწყებდი თამაშს, რადგან ბოლო დროს აქაც (კლუბში) ბევრი არ მითამაშია, რადგან „ლეხშიც“ ძალიან დიდი კონკურენციაა.
2020 წელს ტკივილი უკვე განვიცადეთ გადამწყვეტი მატჩის წაგების შემდეგ. მაშინ იყო კორონავირუსი, ამიტომ ტრიბუნებზე არავინ იყო, გულშემატკივრების მხარდაჭერას ვერ გრძნობდი, ატმოსფერო ძალიან დამთრგუნველი იყო. მატჩის წინა დღეს ორი მნიშვნელოვანი ფეხბურთელი დავკარგეთ, მათგან ერთ-ერთი იყო ხვიჩა კვარაცხელია, რომელსაც წინა საღამოს კორონავირუსი დაუდასტურდა. ალბათ მაშინ მზად არც ვიყავით, მაგრამ ახლა მთელი ქვეყანა ჩვენთან იყო, მათი მხარდაჭერა იყო საოცარი, ფასდაუდებელი. ვგრძნობდი, რომ ეს შესაფერისი მომენტი იყო. მივხვდი, რომ ახლა მზად ვიყავით და დავიმსახურეთ ევრო 2024-ზე გასვლა. ბევრმა მოთამაშემ, მათ შორის მეც, შეცვალა ცხოვრების წესი, ვარჯიში და მატჩისთვის მზადება მხოლოდ იმისთვის, რომ ამ პლეი-ოფისთვის საუკეთესო ფორმაში ყოფილიყო“, – განაცხადა კვეკვესკირმა.