„უცხოური დაფინანსების გამჭვირვალობასთან დაკავშირებით ისტერიული კამპანია არავის გამოუვა, თქვან, რა არის იმაში პრობლემა, რომ შეავსონ დეკლარაცია“, – საპარლამენტო უმრავლესობის ლიდერმა, მამუკა მდინარაძემ „ქართული ოცნების“ ცენტრალურ ოფისში გამართულ ბრიფინგზე განაცხადა.
მდინარაძის თქმით, ამის მეტს კანონი არაფერს ითვალისწინებს.
„ოპონენტები ისევ შერაცხავენ რუსულად, რადგან მათ დღემდე არ მოუშლიათ ტერმინი „რუსული კანონი“. გუშინაც, გუშინწინაც ეს ბევრჯერ ახსენეს. დღემდე რჩება სიყალბე, რაც საუკუნის აფიორის სახით ჩამოყალიბდა ჩვენს ქვეყანაში და რამაც ადამიანების მნიშვნელოვანი ნაწილი შეცდომაში შეიყვანეს.
ამიტომ, ახლა მოუწევთ არა უბრალოდ „რუსული კანონის“ ძახება, არამედ საგნობრივ დისკუსიაში შემოსვლა. რა არის რუსული ან რა პრობლემაა, რომ წელიწადში ერთხელ უცხოური დაფინანსების მიმღებმა ორგანიზაციამ და არა რომელიმე კერძო პირმა, როგორც საზოგადოებას ატყუებდნენ, ისევე შეავსოს დეკლარაცია, როგორც ნებისმიერი ჩვენგანი ავსებს.
საზოგადოებამ უნდა იცოდეს, რა ეწერა და წერია ამ კანონში. კანონში წერია და ერთადერთი მოთხოვნაა, რომ მედიასაშუალებას, „ენჯეოს“ 20%-ზე მეტი თუ აქვს უცხოური დაფინანსება, მომდევნო წლის იანვარში უწევს დეკლარაციის შევსება, შეტანა საკუთარი ანგარიშების – რა მიიღო და რაში დახარჯა. ამ კანონში მეტი არაფერი წერია. ამას თუ არ გააკეთებენ, ჯარიმდებიან გარკვეული თანხით. სხვა დათქმა კანონში არაფერია. საუბარია მხოლოდ და მხოლოდ დეკლარაციის შევსებაზე. ეს საზოგადოებამ დღემდე არ იცის, ბევრმა ადამიანმა დღემდე არ იცის, რომ იანვარში უნდა შეავსოს დეკლარაცია, თუ 20%-ზე მეტ უცხოურ დაფინანსებას მიიღებს. უნდა შეავსოს დეკლარაცია, რა დაფინანსება მიიღო შარშან და რაში დახარჯა. სულ ეს არის კანონის არსი. ერთადერთი, რაც შეიცვალა ამ კანონში, არის ის, რომ სიტყვა უცხოური გავლენის „აგენტი“ ჩანაცვლდა და გაკეთდა ჩანაწერი უცხოური ძალის ინტერესების გამტარებელი ორგანიზაციების შესახებ. სხვა არაფერი შეცვლილა, რადგან შესაცვლელიც არაფერია. ანალოგიური კანონპროექტები განიხილება უკვე ევროკავშირში. იცით, რომ ევრორეკომენდაციაა და ევროკავშირმა უკვე ევროპარლამენტს მიაწოდა თავისი დადებითი დასკვნა და უკვე ევროპარლამენტში განიხილება. საფრანგეთმა დაიწყო განხილვა და სხვა ქვეყნებშიც მიმდინარეობს.
ახლა ეს ისტერიული კამპანია არავის გამოუვა. მოვიდნენ და თქვან, რა არ მოსწონთ, საგნობრივ დისკუსიაში შემოვიდნენ. რა არის იმაში პრობლემა, რომ ყოველ წელს, იანვრის თვეში შეავსონ დეკლარაცია, წარმოადგინონ ხარჯები, შემოსავლები და დაფინანსების წყაროები. მეტს ეს კანონი არაფერს ითვალისწინებს და დღემდე, დარმწუნებული ვარ ეს ამბავი ბევრმა ადამიანმა არც იცოდა. ახლა შემოვიდნენ საგნობრივ დისკუსიაში“, – განაცხადა მამუკა მდინარაძემ.
უცხოური დაფინანსების გამჭვირვალობასთან დაკავშირებით, „ქართული ოცნება“ საკანონმდებლო ინიციატივას წარადგენს.