„მეცის“ თავდამსხმელი გიორგი მიქაუტაძე საფრანგეთის ლიგა 1-ის 28-ე ტურის სიმბოლურ ნაკრებში მოხვდა.
23 წლის ფეხბურთელი ისეთმა გავლენიანმა გამოცემამ გამოარჩია, როგორიც L’Equipe გახლავთ. ხსენებული გაზეთის ვერსიით, გიორგი უკვე მეორედ მოხვდა ტურის სიმბოლურში.
გარდა ამისა, მიქაუტაძე სიმბოლურ ნაკრებში Whoscored-ის ვერსიითაც მოხვდა, სადაც მას ყველაზე მაღალი შეფასება ერგო – 8.8 ქულა. მიქაუტაძემ 28-ე ტურში „ბრესტის“ წინააღმდეგ ორი გოლი გაიტანა, თუმცა მისი გუნდი მაინც დამარცხდა (3:4).
შეგახსენებთ, რომ გიორგი მიქაუტაძემ საფრანგეთის ლიგა 1-ში დუბლი პირველად შეასრულა. მას 14 შეხვედრაში 7 გოლი აქვს გატანილი და „მეცის“ საუკეთესო ბომბარდირია, მიუხედავად იმისა, რომ ნახევარი სეზონი სხვა გუნდში („აიაქსში“) გაატარა. გარდა ამისა, მიქაუტაძის აქტივში 3 საგოლე პასიცაა.
„მეცი“ 23 ქულით ბოლოსწინა, მე-17 ადგილზეა, თუმცა, გადარჩენის შანსი ჯერ კიდევ აქვს. ლაშლო ბოლონის გუნდი მომდევნო ტურში 12 აპრილს, „ლანსს“ უმასპინძლებს.