გიორგი შერმადინი, რომლისთვისაც მიმდინარე სეზონი ტრავმის გამო დასრულდა, ესპანეთის ჩემპიონატის სიმბოლურ ხუთეულში მოხვდა. გამოკითხვის შედეგები, რომელშიც მონაწილეობას ესპანეთის ჩემპიონატის კლუბების მწვრთნელები, მოთამაშეები, მასმედიის წარმომადგენლები და ქომაგები იღებდნენ, დღეს გახდა ცნობილი.
შედეგად, გაირკვა, რომ სიმბოლური ხუთეულში, შერმადინის გარდა, ფაკუ კამპაცო (რეალი), ანდრეს ფელისი (ხუვენტუტი), მარკუს ჰოვარდი (ბასკონია) და დილან ოსეტკოვსკი (უნიკახა) მოხვდნენ.
„შერმადინი სეზონის განმავლობაში მეორე იყო ზუსტ ორქულიანებში (70.3%), მეხუთე – ჩატენვებში (1.3) და ასევე მეხუთე – გამომუშავებულ ფოლებში (4.6). ქართველი კალათბურთელი 2-ჯერ გახდა თვის საუკეთესო მოთამაშე, 4-ჯერ კი ტურის საუკეთესოდ დაასახელეს.
მისი საშუალო მაჩვენებლები (32 მატჩში) 12.0 ქულა, 5.2 მოხსნა, 1.4 პასი, 0.8 დაფარება და 0.5 ჩაჭრა იყო, სარგებლიანობის კოეფიციენტი კი 17.7-ს გაუტოლდა. შერმადინს საუკეთესო მატჩი „ბილბაოსთან“ ჰქონდა, როდესაც 25 ქულა (7-დან 7 საჯარიმო, 10-დან 9 ორქულიანი), 5 მოხსნა, 4 პასი, 4 ჩაჭრა მიითვალა, მისი სარგებლიანობის კოეფიციენტი კი 43-ს გაუტოლდა“, – წერს ACB ლიგის ოფიციალური ვებ-გვერდი.
შეგახსენებთ, რომ „ტენერიფე“ ესპანეთის ლიგა ენდესას მეოთხედფინალშია გასული, სადაც „ბარსელონასთან“ დაპირისპირება ელის. სერია 19 მაისს აიღებს სტარტს, თუმცა, ცნობილია, რომ შერმადინი მოახლოებულ მატჩებს ტრავმის გამო დააკლდება.
⚒️ Fiabilidad absoluta y liderazgo…
GIO SHERMADINI, 𝙢𝙞𝙚𝙢𝙗𝙧𝙤 del MEJOR QUINTETO de la #LigaEndesa 2023-24.
¡Enhorabuena, @gioshermadini!#LigaEndesa | @CB1939Canarias pic.twitter.com/XUjMOm7N3p
— Liga Endesa (@ACBCOM) May 14, 2024