ვიქტორ სანიკიძე მის მიმართ განხორციელებულ ბულინგზე: გულანთებული ადამიანების უკან, რატომღაც, სულ “ნაციონალური მოძრაობის” აქტივი აღმოჩნდება-ხოლმე, ასე მოხდა ამ ახალგაზრდა ქალის შემთხვევაშიც, რომელსაც ფაშიზმიც არ გამოსდის დიდი სურვილის მიუხედავად
„ქართული ოცნების” დეპუტატი, ვიქტორ სანიკიძე სოციალურ ქსელში ეხმიანება მისი მისამართით განხორციელებულ ბულინგს, რომლის ამსახველი ვიდეო “სტრატეგია აღმაშენებლის” წევრმა, თამთა შამათავამ სოციალურ ქსელში გაავრცელა.
როგორც სანიკიძე აღნიშნავს, ასეთი ადამიანები, ბოლოს “ნაციონალური მოძრაობის ” აქტივი აღმოჩნდება ხოლმე და ასე მოხდა ამ შემთხვევაშიც. მისივე თქმით, მეორე მოქალაქესთან ხანგრძლივი მსჯელობის შემდეგ ვერ შეთანხმდნენ, ვინაიდან ამ პიროვნებას, სააკაშვილი დემოკრატიის შუქურად მიაჩნია.
„გულანთებული ადამიანების უკან რატომღაც სულ ნაციონალური მოძრაობის აქტივი აღმოჩნდება-ხოლმე. ასე მოხდა ამ ახალგაზრდა ქალის შემთხვევაში, რომელსაც ფაშიზმიც არ გამოსდის მისი დიდი სურვილის მიუხედავად და თავისივე ტყუილებში იბლანდება როგორც სხვა ყველა ჭეშმარიტი ნაცი.
მეორე, შედარებით ასაკიან ბატონთან ჩანაწერის მერეც გავაგრძელე საუბარი და ხანგრძლივი მსჯელობის შემდეგ დავიშალეთ შეუთანხმებლად – მას მიაჩნია, რომ სააკაშვილი დემოკრატიის შუქურაა და შევთანხმდით რომ ვერ შევთანხმდებოდით.
რაც შეეხება ამ ორ ვიდეოს შორის მომხდარ ამბავს, შეგნებულად გამოვტოვებ, რადგან ეს სულ სხვა ამბავია და ჩემს მეუღლესთან და მცირეწლოვან ბავშვთან ერთად ასევე ბავშვიან კაცს ალბათ, ყოველთვის მოვერიდები, დანარჩენს კი ამ ხალხის გარეშე მოვიკითხავ…” – წერს ვიქტორ სანიკიძე სოციალურ ქსელში.