რატი იონათამიშვილი ესტონეთის პარლამენტში მომზადებულ პროექტზე: როდესაც დემოკრატიაზე დაიწყებენ საუბარს, მით უმეტეს საქართველოსთან მიმართებაში, ჯერ მიხეილ სააკაშვილი და „ნაციონალური მოძრაობა“ დაგმონ
რატი იონათამიშვილი ესტონეთის პარლამენტში საქართველოში დემოკრატიის შესახებ მომზადებულ პროექტს ეხმაურება. ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე აცხადებს, რომ არავის აქვს უფლება ქვეყნის შიდა საქმეებში ჩაერიოს.
„როდესაც დემოკრატიაზე დაიწყებენ საუბარს, მით უმეტეს საქართველოსთან მიმართებაში, ჯერ მიხეილ სააკაშვილი და „ნაციონალური მოძრაობა“ დაგმონ, ვინც ყველაფერს აკეთებდა, იმისთვის რომ ძირი გამოეთხარა ქართლი დემოკრატიისთვის. არავის აქვს უფლება ჩვენი ქვეყნის საშინაო პროცესებში ჩაერიოს.ისიც ფაქტია, რომ მსგავსი ჩარევები ბუმერანგივით უბრუნდებათ უკან და შედეგებს ვერ აღწევენ. თუ დასკვნები ვერ გამოიტანეს, მით უარესი. ფაქტია, რომ საქართველოში, პირიქით, დემოკრატიული პროცესები სულ უფრო მეტად მტკიცდება, მიუხედავად იმისა, რომ ოპოზიცია ძალიან ცდილობს ამას ხელი შეუშალოს. ისიც ხელმოცარულია ამ მიმართულებით. ჩვენ კი ამ პასუხისმგებლობას ბოლომდე, კეთილსინდისიერად ვასრულებთ“, – განაცხადა იონათამიშვილმა.
ესტონეთის პარლამენტის საგარეო ურთიერთობათა კომიტეტმა „საქართველოში დემოკრატიის კრიზისის“ სახელწოდებით განცხადების პროექტი მოამზადა. დოკუმენტში 44 დეპუტატი საქართველოში უცხოური გავლენის შესახებ გამჭვირვალობის კანონის მიღებას გმობს. განცხადებაში ნათქვამია, რომ საქართველოში ანტიდემოკრატიული კრიზისის მოგვარებამდე ესტონეთმა უნდა დაბლოკოს საქართველოს ევროკავშირში გაწევრიანების ყველა შემდგომი პროცესი. პარლამენტარები მიიჩნევენ, რომ უნდა გაიყინოს საქართველოსა და ევროკავშირს შორის უვიზო მიმოსვლის შეთანხმებაც.
განცხადების პროექტის ინიციატორი პარტია „რეფორმების“ წევრი ერიკ-ნილეს კროსია. პოლიტიკოსი 2007 წელს საერთაშორისო ურთიერთობებში მიხეილ სააკაშვილის მთავრობის კონსულტანტი იყო, სააკაშვილმა ის 2013 წელს დააჯილდოვა კიდეც. მეტიც, მიხეილ სააკაშვილი მას მეგობარსა და საქართველოს ეკონომიკური რეფორმების არქიტექტორს უწოდებდა. ესტონეთის სპეცსამსახურების ყოფილი კონსულტანტი ერთი პერიოდი დროებით ინტერპოლის ცირკულარითაც იძებნებოდა. კროსს აეკრძალა ფიზიკური პირის სტატუსით ამერიკის შეერთებულ შტატებში შესვლა.
პარალელურად ესტონეთში ცენტრისტული პარტია საქართველოს მხარდამჭერ განცხადებას აინიცირებს.
