ჯო ბაიდენი მისი შვილის წინააღმდეგ გამამტყუნებელ განაჩენზე: მე პრეზიდენტი ვარ, მაგრამ ასევე მამა ვარ
მე პრეზიდენტი ვარ, მაგრამ ასევე მამა ვარ, – ასე გამოეხმაურა აშშ-ის პრეზიდენტი, ჯო ბაიდენი მისი შვილის, ჰანტერ ბაიდენის წინააღმდეგ გამოტანილ გამამტყუნებელ განაჩენს.
„როგორც გასულ კვირას ვთქვი, პრეზიდენტი ვარ, მაგრამ ასევე მამა ვარ. მე და ჯილს გვიყვარს ჩვენი შვილი და ჩვენ ვამაყობთ იმ ადამიანით, რომელიც ის დღეს არის. ბევრ ოჯახს, რომელთა საყვარელი ადამიანები ებრძოდნენ დამოკიდებულებას, ესმით სიამაყის გრძნობა, როდესაც ხედავთ, რომ საყვარელი ადამიანი გამოდის ამ სიტუაციიდან. როგორც გასულ კვირას ვთქვი, მე მივიღებ ამ საქმის შედეგს და გავაგრძელებ სასამართლო პროცესის პატივისცემას მაშინ, როდესაც ჰანტერი განიხილავს საჩივარს. მე და ჯილი მუდამ ვიქნებით ჰანტერისა და ჩვენი ოჯახის დანარჩენი წევრების გვერდით ჩვენი სიყვარულითა და მხარდაჭერით. ამას არასოდეს არაფერი შეცვლის“, – აღნიშნა ჯო ბაიდენმა.
ნაფიცმა მსაჯულებმა ჰანტერ ბაიდენის მიერ იარაღის უკანონო შენახვის საქმეზე გამამტყუნებელი განაჩენი გამოიტანეს.
საქმე ეხება 2018 წლის ოქტომბერში ჰანტერ ბაიდენის მიერ შეძენილ იარაღს. ბრალდების მხარის მტკიცებით, დელავერის შტატში, იარაღის შეძენის დროს მან მოიტყუა, რომ ნარკოტიკის მომხმარებელი არ იყო.
კიდევ ერთი ბრალდება უკავშირდება ჰანტერ ბაიდენის მიერ იარაღის ფლობის პერიოდში ნარკოტიკების მოხმარებას. აშშ-ის ფედერალური კანონის მიხედვით, ნარკოტიკების მომხმარებლის მიერ ცეცხლსასროლი იარაღის ფლობა დანაშაულია.
