გრიგოლ ლილუაშვილი: რუსეთ-უკრაინის ომის ფონზე, დაფიქსირდა უცხოური და ქვეყანაში მოქმედი ცალკეული ძალების მხრიდან მზარდი დაინტერესება ახალ სატრანსპორტო მარშრუტებთან დაკავშირებით
“მინდა, ყურადღება გავამახვილო, რომ რუსეთ-უკრაინის ომის ფონზე, საერთაშორისო გადაზიდვების კუთხით შეცვლილი ტენდენციებისა და გაზრდილი ინტერესებიდან გამომდინარე, დაფიქსირდა უცხოური და საქართველოში მოქმედი ცალკეული ჯგუფების და ძალების მხრიდან მზარდი დაინტერესება ახალი სატრანსპორტო მარშრუტების ამოქმედების პერსპექტივებთან დაკავშირებით”, – ამის შესახებ სუს-ის ხელმძღვანელმა გრიგოლ ლილუაშვილმა პარლამენტში განაცხადა.
როგორც ლილუაშვილმა აღნიშნა, ასევე ცალკეული ქვეყნების ბიზნესსექტორის წარმომადგენელთა მხრიდან მიმდინარეობდა ახალი ბიზნესპროექტების შემუშავებისა და განხორციელების მცდელობები.
„ქვეყნის ეკონომიკური უსაფრთხოების უზრუნველსაყოფად სამსახური ატარებდა აქტიურ ღონისძიებებს უცხო ქვეყნის სპეციალური სამსახურების მიერ ეკონომიკურ პროცესებში ჩარევის პრევენციისა და მათი დირექტივებით მოქმედი კერძო ორგანიზაციების გამოვლენის მიმართულებით“, – აღნიშნა ლილუაშვილმა.
სუს-ის ხელმძღვანელის თქმით, 2023 წელს სუს-ის კონტრდაზვერვითი საქმიანობის ფარგლებში გამოვლინდა, რომ უცხო ქვეყნის სპეციალური სამსახურების განსაკუთრებულ ინტერესს წარმოადგენდა პოლიტიკური პარტიების რეიტინგები და 2024 წელს დაგეგმილ საპარლამენტო არჩევნებში მათი გამარჯვების შანსები.
ამასთან, მისივე განცხადებით, „საანგარიშო პერიოდში სუს-ი განაგრძობდა საქართველოს თავდაცვის ძალებისა და სხვა ძალოვანი უწყებების კონტრდაზვერვით უზრუნველყოფას, რადგან ცალკეული ქვეყნების სპეციალური სამსახურების განსაკუთრებული ინტერესის სფეროში კვლავ შედიოდა საქართველოს ძალოვანი უწყებების საქმიანობა“.