გიორგი კალანდია რადიკალების განცხადებებზე: ბიძინა ივანიშვილმა საქართველოში დააბრუნა იოანე ზოსიმეს ხელნაწერი – არის ისეთი ფაქტები, რომელიც ისტორიაში შედის ოქროს ასოებით
„ყველაფერი მივიწყებას მიეცემა, მაგრამ დარჩება ის, რომ ამა და ამ კაცმა, ანუ ბიძინა ივანიშვილმა საქართველოში დააბრუნა იოანე ზოსიმეს ხელნაწერი. ყველაფერი მიეცემა მივიწყებას, მაგრამ არის ისეთი ფაქტები, რომელიც ისტორიაში შედის ოქროს ასოებით”, – ამის შესახებ ხელოვნების სასახლის გენერალურმა დირექტორმა, გიორგი კალანდიამ გადაცემაში „იმედი Live“ განაცხადა.
მან იოანე ზოსიმეს ხელნაწერის საქართველოში დაბრუნების მნიშვნელობაზე ისაუბრა. ასევე, გამოეხმაურა რადიკალების განცხადებებს ბიძინა ივანიშვილის ქველმოქმედებაზე.
„ეს გზა გამოიარა დავით სარაჯიშვილმა, ეს გზა გამოიარა იაკობ გოგებაშვილმა. უფრო მეტსაც ვიტყვი – ილია ჭავჭავაძის ბოლო წლები რომ გაიხსენოთ, აქ არაფერი განსაკუთრებული არ ხდება. ასევე, ნიკო ნიკოლაძე და ასე შემდეგ. ანუ, ყველა დიდი მეცენატი და არა მარტო საქართველოში, ხშირად გადიოდა ამ გზას. სწორედ ამაშია მეცენატობის განსაკუთრებულობა და ეს არ არის მარტო მეცენატობა ამ შემთხვევაში. ამას ვერ დავარქმევთ მარტო ქველმოქმედებას. ეს არის დიდი ისტორიული ფაქტი. ყველაფერი დღეს რაზეც ვსაუბრობთ, ამ პოლიტიკოსმა ეს თქვა, იმან – ის, ყველაფერი ეს მივიწყებას მიეცემა, მაგრამ დარჩება ის, რომ ამა და ამ კაცმა, ანუ ბიძინა ივანიშვილმა საქართველოში დააბრუნა იოანე ზოსიმეს ხელნაწერი. ყველაფერი მიეცემა მივიწყებას, მაგრამ არის ისეთი ფაქტები, რომელიც ისტორიაში შედის ოქროს ასოებით“, – განაცხადა კალანდიამ.
ბიძინა ივანიშვილმა გუშინ, „კრისტის“ აუქციონზე მილიონ ფუნტად შეიძინა პალიმფსესტი, რომელიც მოიცავს, ერთი მხრივ, V-VII სს. არამეულ ენაზე გადაწერილ მასალას, არსებითად ბიბლიურ და ასკეტურ ფრაგმენტებს, ხოლო, მეორე მხრივ, სინას მთაზე მოღვაწე იოანე ზოსიმეს მიერ 979 წელს გადაწერილ ლიტურგიკულ ტექსტებს სინას მთის კოლექციიდან. უნიკალური ხელნაწერი საჩუქრად ეროვნულ მუზეუმს გადაეცემა.