არჩილ თალაკვაძე: ზუსტად შემიძლია გითხრათ, რომ საქართველო განაგრძობს ევროპული და ევროატლანტიკური ტრაექტორიით სვლას
„ზუსტად შემიძლია გითხრათ, რომ საქართველო განაგრძობს ევროპული და ევროატლანტიკური ტრაექტორიით სვლას, ხოლო ჩვენი ოპონენტები, კოლექტიური „ნაცმოძრაობა“ თავისი ლობისტებით, არასამთავრობოებს ამოფარებული აქტივისტებით მართლა მიდის იზოლაციაში”, – ამის შესახებ გადაცემაში „იმედი LIVE“ პარლამენტის ვიცე-სპიკერმა, არჩილ თალაკვაძემ განაცხადა.
„ჩვენი ოპონენტები, კოლექტიური ნაცმოძრაობა თავისი ლობისტებით, არასამთავრობოებს ამოფარებული აქტივისტებით მართლა მიდის იზოლაციაში. შეგახსენებთ, ვინ არიან ეს ხალხი: ფულს იხდიდნენ, რომ საქართველოსთვის დაებლოკათ ევროპული პერსპექტივა, კანდიდატის სტატუსი; რომ საერთაშორისო საზოგადოებისთვის წარმოეჩინათ, თითქოს ჩვენი ქვეყანა ანტიევროპულ გზას ადგას, ყველაფერი გაუარესებულია და თითქოს საქართველო დაშორდა ცივილიზაციას. ამაში იხდიდნენ ფულს. ევროპაში დადიოდნენ, რომ დაებლოკათ საქართველოს ევროპული მომავალი. ესეც აღიარებულია, თვითონ თქვეს. კანდიდატის სტატუსი რომ მივიღეთ, ყველაზე დამწუხრებული სახეები მათ ჰქონდათ. სახელმწიფო ინსტიტუტებზე ჰაკერული შეტევები რომ იყო, ყველაზე გახარებული ეგ ხალხი იყო. ქართული კომპანიების აქციების მოკლევადიანი ვარდნა იყო ბირჟებზე და აღტაცებაში იყო ეს ხალხი რადიკალური ოპოზიციიდან. ვალუტის მერყეობა იყო და იქაც გახარებულები იყვნენ.
ზუსტად შემიძლია გითხრათ, რომ საქართველო განაგრძობს ევროპული და ევროატლანტიკური ტრაექტორიით სვლას, თავისი კუთვნილი ადგილისკენ მოძრაობას, რაც არის ადგილი ევროპულ ოჯახში, და არც ერთი ნაბიჯი უკან ჩვენი მიღწეული პროგრესიდან არ იქნება გადადგმული“, – აღნიშნა თალაკვაძემ.