თამარ ჩიბურდანიძე: ვულოცავთ ამერიკელ ხალხს დამოუკიდებლობის დღეს. ვიმედოვნებთ, რომ ჩვენს ბრძოლას სუვერენიტეტისთვის აუცილებლად დააფასებენ და ურთიერთობებიც ძლიერ პარტნიორობაში გადავა
პარტია „ხალხის ძალის“ წევრი თამარ ჩიბურდანიძე ამერიკელ ხალხს დამოუკიდებლობის დღეს ულოცავს და სოციალურ ქსელში წერს, „ამერიკის ისტორიაში 4 ივლისი რომ არ ყოფილიყო, ვერ იქნებოდა ის, რაც დღეს არის“.
მისივე თქმით, ძლიერი სახელმწიფოს შექმნა, მხოლოდ თავისუფალ ხალხს შეუძლია და არა სხვის მორჩილებაში მყოფთ.
„თუ ვინმემ იცის დამოუკიდებლობის და თავისუფლების ფასი, მათ შორის ამერიკელმა ხალხმა. ორი საუკუნის წინ მიღებული „თავისუფლების დეკლარაცია“ უძლიერესი სახელმწიფოს ჩამოყალიბების საბაბი გახდა. შეუძლებელია, არ აფასებდე იმ სახელმწიფოს, რომელიც თავისუფლების სიმბოლოდ და სახელმწიფოებრიობის მაგალითად იქცა მთელ მსოფლიოში.
ამერიკის ისტორიაში 4 ივლისი რომ არ ყოფილიყო, ვერ იქნებოდა ის, რაც დღეს არის. ძლიერ სახელმწიფოს მხოლოდ თავისუფალი ხალხი ქმნის და არა სხვის მორჩილებაში მყოფი ერი. სწორედ ამისთვის ვისწრაფვით დღეს, რომ საქართველო გახდეს სრულად დამოუკიდებელი და სუვერენული სახელმწიფო, რათა თავად შევძლოთ ქვეყნის მართვა და ძლიერ, ერთიან სახელმწიფოდ ჩამოყალიბება.
ვულოცავთ ამერიკელ ხალხს დამოუკიდებლობის დღეს. ვიმედოვნებთ, რომ ჩვენს ბრძოლას სუვერენიტეტისთვის აუცილებლად დააფასებენ და ჩვენი ურთიერთობებიც ძლიერ პარტნიორობაში გადავა,“ – წერს თამარ ჩიბურდანიძე.