გურამ მაჭარაშვილი: დღევანდელი ხელისუფლების პირობებში ამნისტიის პროექტი ნიშნავს ადამიანების რეალურ რესოციალიზაციას. წინა ხელისუფლების პირობებში ამნისტია პირდაპირი გაგებით ნიშნავდა სიკვდილისგან თავის დაღწევას, სიცოცხლის და ჯანმრთელობის შენარჩუნებას
ამნისტიის აქტის მნიშვნელობაზე ისაუბრა „ხალხის ძალის“ აღმასრულებელმა მდივანმა პარლამენტის იურიდიულ საკითხთა კომიტეტის სხდომაზე, სადაც ამნისტიის პროექტის განხილვა მოეწყო. პარლამენტში განსახილველად შესული პროექტი დამტკიცების შემთხვევაში ნაკლებად მძიმე დანაშაულის ჩამდენ დაახლოებით 7 ათასამდე პირს შეეხება.
როგორც გურამ მაჭარაშვილმა განაცხადა, მოქმედმა ხელისუფლებამ კარგად იცის რას ნიშნავს პატიმრის უფლებები, მაგრამ ასევე გასათვალისწინებელია ის გარემოება, რომ ამნისტიის შედეგად პატიმართა მასობრივმა გათავისუფლებამ არ გამოიწვიოს კრიმინალის ზრდა, რასაც ბუნებრივად მოჰყვება საზოგადოების უკმაყოფილება. სწორედ ამიტომ, მისი თქმით, აუცილებელია ბალანსის დაცვა.
„მინდა მივმართო საზოგადოებას, განსაკუთრებით პატიმრებსა და მათი ოჯახის წევრებს. რა თქმა უნდა, ესაა ის ხელისუფლება, რომელმაც ზუსტად იცის რას ნიშნავს პატიმრის უფლება. დღევანდელი ხელისუფლების პირობებში ამნისტიის პროექტი ნიშნავს ამ ადამიანების რეალურ რესოციალიზაციას. წინა ხელისუფლების პირობებში ამნისტია პირდაპირი გაგებით ნიშნავდა სიკვდილისგან თავის დაღწევას, სიცოცხლის და ჯანმრთელობის შენარჩუნებას. დღეს კი, ის ადამიანები, რომლებიც სასჯელს იხდიან და რომელთაც შეეხებათ ამნისტიის აქტი, რესოციალიზაციის პროცესში ერთვებიან.
ჩვენ ვიცით რას ნიშნავს პატიმრის უფლება და ვიცით როგორ ხდება ეს იმ ევროპულ ქვეყნებში, სადაც პატიმართა რაოდენობის კუთხით დაცულია ბალანსი. ის, რომ ჩვენ გვინდა რაც შეიძლება ნაკლები პატიმარი გვყავდეს, რეალობაა ( სისხლის სამართლის პოლიტიკა ჩვენი ხელისუფლების პირობებში არის ჰუმანური), მაგრამ ამავდროულად უნდა იყოს დაცული ბალანსი, რადგან სახელმწიფო პატიმრის უფლებების დაცვასთან ერთად იმაზეცაა პასუხისმგებელი, რომ ამნისტიის მასობრივად გავრცელების გამო არ იმატოს კრიმინალმა. ამ შემთხვევაში, საზოგადოების მეორე ნაწილს ბუნებრივად ექნება პრეტენზია კრიმინალის ზრდის გამო და ესეც გასათვალისწინებელია.
ამიტომ, ამ საკითხს ჩვენ დეტალურად კიდევ ერთხელ განვიხილავთ. რა თქმა უნდა, შესაბამისი კონსულტაციების საფუძველზე ცვლილებები შეიძლება იყოს, თუმცა, არსი ის არის, რომ ბალანსი დავიცვათ – ერთი მხრივ პატიმრების გათავისუფლებას და მეორე მხრივ, კრიმინალის გაზრდისგან დაცვას შორის“, – განაცხადა გურამ მაჭარაშვილმა.