+ -

“ჩვენ იმედი გვაქვს, რომ იქნება ძალიან ობიექტური დაკვირვების პროცესი”, – ამის შესახებ იურიდიულ საკითხთა კომიტეტის თავმჯდომარის პირველმა მოადგილემ, საპარლამენტო უმრავლესობის წევრმა დავით მათიკაშვილმა გადაცემა “დღის ქრონიკასთან” განაცხადა.

„რაც შეეხება IRI-ს, სხვა სადამკვირვებლო მისიებს, ყველა ჩვენს პარტნიორს, ჩვენ გვაქვს ცალსახად ეს არაერთგზის ნათქვამი, ხაზგასმული, რომ მხოლოდ და მხოლოდ მივესალმებით და ვიქნებით მოხარული, რაც მეტი დამკვირვებელი იქნება. ეს ყველაფერი, კანონის ფარგლებში, ცენტრალური საარჩევნო კომისიის მხრიდან და იმ ყველა უწყების მხრიდან, ვინც არეგულირებს ამ საკითხებს, ცხადია, მიმდინარეობს.

ჩვენ დარწმუნებული ვართ, რომ ბევრი დამკვირვებელი იქნება ჩვენს ქვეყანაში, ისევე, როგორც ეს ჩვეულებრივ მოვლენად, ყველა არჩევნების დროს ხდება და იმაშიც დარწმუნებული ვარ, რომ იმ ძალიან მაღალი პროცენტით გამარჯვებას, რომელსაც ქართველი ხალხი 26 ოქტომბერს კიდევ ერთხელ მიანიჭებს „ქართულ ოცნებას“ მანდატს, ეს სადამკვირვებლო ორგანიზაციები ძალიან ობიექტურად მიიღებენ და ასახავენ თავის ანგარიშებში. მაგალითად, 4 წლის წინ სამწუხარო რეალობის წინაშე დავდექით, როდესაც ორგანიზაციამ, რომელიც პასუხისმგებელი იყო დაედგინა, დაედასტურებინა არჩევნების შედეგები, პირიქით აქეთ პარალელური საარჩევნო პროცესი გააყალბა და ამ ყველაფრით შექმნა საფუძველი იმისთვის, რომ ვიღაც  გადაწყვეტილების მიმღები პირების სურვილებით საქართველოში მძიმე ვითარება შექმნილიყო, მაგრამ ეს ასე არ მოხდა.

ჩვენ იმედი გვაქვს, რომ იქნება ძალიან ობიექტური დაკვირვების პროცესი და იმ ობიექტურ რეალობას, რომელსაც ყველა ჩვენი მეგობარი და პარტნიორი დაინახავს ქვეყნის ფარგლებს გარედან, სადამკვირვებლო მისიების ჭრილში და სხვა ნებისმიერი მიმართულებით, რა თქმა უნდა, ეს ასახული იქნება შესაბამის დასკვნებში“, – აღნიშნა დავით მათიკაშვილმა.