პარიზის 2024 წლის ოლიმპიადაზე მამაკაცთა შორის ჩოგბურთის ტურნირის ფინალისტები ცნობილი გახდა. როლან გაროსის კორტებზე ოქროს მედლისთვის სერბი ნოვაკ ჯოკოვიჩი ესპანელ კარლოს ალკარასს შეხვდება.
ჯოკოვიჩმა ნახევარფინალში იტალიელი ლორენცო მუზეტი ორ სეტში, 6:4, 6:2 დაამარცხა, რის შედეგადაც დიდი სლემის ტურნირების 24-გზის ჩემპიონი ოლიმპიადის ფინალში პირველად გავიდა.
რაც შეეხება კარლოს ალკარასს, თავისი შეხვედრა ესპანელმაც ორ სეტში მოიგო, მან კანადელ ფელიქს ოჟე-ალიასიმეს 6:1, 6:1 სძლია.
ჯოკოვიჩმა და ალკარასმა ბოლოს ერთმანეთის წინააღმდეგ ივლისში, უიმბლდონის ფინალში ითამაშეს. ესპანელმა მეტოქე დამაჯერებლად, სამ სეტში დაამარცხა.
მამაკაცთა შორის ოლიმპიადის ფინალი 4 აგვისტოსაა დაგეგმილი. მანამდე, 3 აგვისტოს, ბრინჯაოს მედლისთვის მუზეტი ოჟე-ალიასიმეს შეხვდება.