ბექა ოდიშარია: დავით არახამიას მავნებლური განცხადებები, მისი არაკვალიფიციური და მტრული დამოკიდებულება საქართველოსა და საქართველოს ხელისუფლების მიმართ ახალი არ არის
საპარლამენტო უმრავლესობის წევრის, ბექა ოდიშარიას განცხადებით, უკრაინის რადას ფრაქცია „ხალხის მსახურის“ თავმჯდომარის, დავით არახამიას მტრული განცხადებაბი საქართველოს ხელისუფლების მიმართ ახალი არავისთვის არ არის. მისივე თქმით, ხელისუფლება უკრაინასთან თანამშრომლობას ცალმხრივი მეგობრობის რეჟიმში აგრძელებს, რაც სამწუხაროა.
“დავით არახამიას მავნებლური განცხადებები, მისი არაკვალიფიციური და მტრული დამოკიდებულება საქართველოსა და საქართველოს ხელისუფლების მიმართ ახალი არ არის.
ჩვენ უკრაინელ ხალხს და უკრაინულ სახელმწიფოს მხარს ვუჭერთ დღემდე და სამწუხაროდ, ცალმხრივი მეგობრობის რეჟიმში ვაგრძელებთ ურთიერთობებს არახამიას, რომელიც თავისი უხამსი განცხადებებით ახალი არ არის, პასუხს ახლა არ გავცემდი. სანქციების გვერდის ავლასთან დაკავშირებით მინდა, ძალიან მკაფიოდ გითხრათ, არახამიას უხამსი გამონათქვამები, რომ არახალია ამაზე მოგახსენეთ.
სულ ახლახან იყო ჩამოსული ამ დარგის ოფიციალური ხელმძღვანელები და კურატორები ამერიკის შეერშეერთებული შტატებიდან, დიდი ბრიტანეთიდან და ევროკავშირიდან, რომლებმაც ცალსახად თქვეს, რომ სანქციებიდან თავის არიდების საშუალება საქართველოში არის ნულის ტოლი“, – განაცხადა ოდიშარიამ.
ცნობისთვის, უკრაინის რადას ფრაქცია „ხალხის მსახურის“ თავმჯდომარე დავით არახამია საქართველოს მთავრობის განცხადებას გამოეხმაურა და აღნიშნა: „დაგვიბრუნდეს მიხეილ სააკაშვილი, შეწყდეს ფრენები რუსეთთან, აგრესორის დახმარება სანქციების გვერდის ავლაში, მაშინ ურთიერთობების ნორმალიზებაც მარტივად მოხდება“.
ამასთან, საქართველოს მთავრობამ გუშინ გაავრცელა განცხადება, სადაც აღნიშნულია, რომ ურთიერთობების მოსაწესრიგებლად მნიშვნელოვანი და აუცილებელია, უკრაინის ხელისუფლებამ საქართველოს გადასცეს დამნაშავეები, რომლებიც დღეს უკრაინის ხელისუფლებაში მაღალ თანამდებობებს იკავებენ.
„ვიმედოვნებთ, უკრაინის ხელისუფლება გადახედავს გადაწყვეტილებებს, რომლებიც უხეშად ეწინააღმდეგება მეგობრულ სულისკვეთებას საქართველოსა და უკრაინას შორის“, – აღნიშნულია განცხადებაში.