სოსო არჩვაძე: ეკონომიკის შთამბეჭდავი ზრდა და მაკროეკონომიკური პარამეტრების ხარისხობრივი გაუმჯობესება ქმნის და აძლიერებს იმ პოზიტიურ მოლოდინებს, რომლებიც ბიზნესის სფეროს წარმომადგენლებსა და ინვესტორებს გააჩნიათ მზარდი პოზიტიური შედეგებისადმი

“მიუხედავად იმისა, რომ საზოგადოებრივი ყურადღება და აქტიურობა კონცენტრირებული იყო საპარლამენტო არჩევნებზე, ხოლო ეკონომიკაზე მოქმედი გარე ფაქტორები კვლავაც საკმაო დოზით შეიცავდნენ მომეტებულ რისკებს, საქართველოს ეროვნული მეურნეობა მაინც ინარჩუნებდა მდგრადი და დინამიური განვითარების ტემპს, რაც მას არსებითად გამორჩევდა არა თუ რეგიონულ, არამედ გლობალური მასშტაბით”, – ამის შესახებ ეკონომიკის ექსპერტი სოსო არჩვაძე სოციალურ ქსელში წერს.

ეკონომისტი საქსტატის მონაცემებს ეხმიანება, რომლის ცნობითაც, 2024 წლის ოქტომბერში ეკონომიკურმა ზრდამ 11% შეადგინა, მიმდინარე წლის ათ თვეში კი ეკონომიკური ზრდა 10%-ით განისაზღვრა. ექსპერტის თქმით, ეკონომიკის დინამიზმის პოზიტიური ტრენდი ადეკვატურად აისახება შრომის ბაზარზეც, სადაც ფიქსირდება დასაქმების რაოდენობრივი და ხარისხობრივი პარამეტრების არსებითი გაუმჯობესება.

დასაქმებულთა საერთო რაოდენობა გაიზარდა 41.1 ათასით. აღნიშნული მატების 76 პროცენტი მოდიოდა დაქირავებით დასაქმებულთა მატებაზე. ამასთან, სამეწარმეო სფეროში დასაქმებულებიდან 92.5 პროცენტი კერძო სექტორზე მოდის. – ეს თითქმის 40 პუნქტით აღემატება 2003 წლის მაჩვენებელს. ეკონომიკის შთამბეჭდავი ზრდა და მაკროეკონომიკური პარამეტრების ხარისხობრივი გაუმჯობესება, მათი მაღალი კორელაცია სახელმწიფო ინსტიტუტების ფუნქციონირების ეფექტიანობასთან, მათ შორის ბიუროკრატიის დაბალ დონესთან, ქმნის და აძლიერებს იმ პოზიტიურ მოლოდინებს, რომლებიც ბიზნესის სფეროს წარმომადგენლებსა და ინვესტორებს გააჩნიათ საქართველოს ეკონომიკის შესაძლებლობებისა და მასში ჩართულობის პერმანენტულად მზარდი პოზიტიური შედეგებისადმი”, – წერს სოსო არჩვაძე.