თეა წულუკიანი: ე.წ. ვეტინგის სისტემა კატეგორიულად მიუღებელია და ჩვენი ხელისუფლების პირობებში არასდროს არ იქნება გაზიარებული
“ე.წ. ვეტინგის სისტემა კატეგორიულად მიუღებელია და ჩვენი ხელისუფლების პირობებში არასდროს გაზიარებული არ იქნება”, – ამის შესახებ საქართველოს კულტურისა და სპორტის მინისტრმა თეა წულუკიანმა განაცხადა.
მისი თქმით, ამგვარი რეფორმები დემოკრატიული ქვეყნისთვის დამაზიანებელია.
„ე.წ. ვეტინგის სისტემა ჩვენი ხელისუფლების პირობებში არასდროს გაზიარებული არ იქნება. ახლა უკვე თვალსაჩინოა, რომ მოცემული „ვეტინგის“ სისტემა საქართველოში უნდა შემოიტანოს კრიმინალმა ზურაბ ადეიშვილმა, მისმა ყოფილმა მოადგილემ, წოწორიამ, რომელთაც უკვე შეაცდინეს ერთი-ორი სხვა ქვეყანა და სავალალო შედეგი მოიტანა ამ ე.წ. რეფორმამ თუნდაც მოლდოვაში, სადაც მათ ეს ფანდი გაუვიდათ. ჩვენ უკვე ვიცით, ვინ არის ზურა ადეიშვილი. ჩვენმა საზოგადოებამ და სახელმწიფომ თავის თავზე გამოსცადა ამგვარი ე.წ. რეფორმების ბოროტი, დამაზიანებელი ეფექტები და ჩვენ სწორედ, ამგვარ ფსევდორეფორმებს, იდეებს არ გავიზიარებთ“, – განაცხადა წულუკიანმა.