თამარ ჩიბურდანიძე: სალომე ზურაბიშვილის ამერიკაში ვიზიტზე მახსენდება ფუფალას სიტყვები კინოფილმიდან – „არც შიოლა ყოფილა, მე გამოვიგონე…“ – და მაინც, როგორი უფერულია მისი ვიზიტი შტატებში, ვილსონის მიერ გაკეთებული ამდენი ფერუმარილის მიუხედავად?
“ოპოზიციის ლობიზმისთვის დიდი ფულით დაფინანსებული ჯო ვილსონის მიერ სალომე ზურაბიშვილის ტრამპის კარზე მიახლება, სხვა არაფერია, თუ არა დერეფნებში მიღწეული „შეთანხმება” ტრამპსა და საქართველოს ყოფილი პრეზიდენტის ოპოზიციას შორის”, – ამის შესახებ სოციალურ ქსელში “ხალხის ძალის” წევრი თამარ ჩიბურდანიძე წერს.
მისი თქმით, რადიკალური ოპოზიციის მიერ უცხოური ლობიზმით დაგეგმილ ვიზიტებში დახარჯული ფული ერთადერთ მიზანს ხმარდება – შეინარჩუნონ საკუთარი ამომრჩევლები ქუჩაში. თუმცა, როდემდე, თავადაც არ იციან.
“თუ რამდენად აფასებს ტრამპი „ყოფილებს”, რომლებიც ჯერ ბაიდენის მსახურნი იყვნენ და ახლა მას სთავაზობენ მორჩილებას, ეს ყველამ კარგად ვიცით. მართალია, პოლიტიკა პიროვნულ ღირებულებებს მაინცდამაინც არ აფასებს, მაგრამ არც მთლად ასე თავზელაფდასხმულობას აღიარებს, თუნდაც მაკიაველის მოძღვრებით. სალომეს ირეალური მიზანი – დარჩეს ისევ პრეზიდენტად, ვერ ამართლებს საფრანგეთი-ამერიკის დერეფნებში წარმოებულ „გაცნობით პოლიტიკას“.
ოპოზიციამ მემკვიდრეობით მიიღო სააკაშვილისგან ფასადური პოლიტიკის წარმოება და წარმატებით აგრძელებს დიდი ბელადის გზას. უცხოური ლობიზმით დაგეგმილ ვიზიტებში დახარჯული ფული ერთადერთ მიზანს ხმარდება – შეინარჩუნონ საკუთარი ამომრჩევლები ქუჩაში. თუმცა, როდემდე, თავადაც არ იციან.
ჯო ვილსონი, რომელიც ოპოზიციისთვის ამერიკის პრეზიდენტია, რის ვაი-ვაგლახით ახერხებს ჰოლში თუ მოსაცდელში გავლისას ზურაბიშვილისა და ადგილობრივების ხელის ჩამორთმევას. ტრამპის ინაუგურაციის დღეს კი ვიხილავთ კიდევ ერთ ფოტოსესიას, რომელსაც, საფრანგეთის მსგავსად, საქართველოში ჩამოსვლამდე გაუვა ყავლი.
სალომე ზურაბიშვილის ამერიკაში ვიზიტზე მახსენდება ფუფალას სიტყვები კინოფილმიდან „ნატვრის ხე“ – „არც შიოლა ყოფილა, მე გამოვიგონე ყველაფერი…“. და მაინც, როგორი უფერულია მისი ვიზიტი შტატებში, მიუხედავად ვილსონის მიერ გაკეთებული ამდენი ფერუმარილისა?”, – წერს თამარ ჩიბურდანიძე.