ზურაბ ქადაგიძე: ვაშინგტონში ჩასული საფრანგეთის პრეზიდენტი და ბრიტანეთის პრემიერი ან უკრაინის არჩევნებზე დათანხმდებიან ტრამპს, ან არა და, ოლაფ შოლცის გზას გაუყვებიან
პარტია „ხალხის ძალის“ წევრი ზურაბ ქადაგიძე დონალდ ტრამპის პოლიტიკას სოციალურ ქსელში ეხმიანება.
წილი ნაყარია, ბრიუსელს აქვს შანსი, არჩევნებით მშვიდად გაუშვას ზელენსკი, – წერს ექსპერტი და აღნიშნავს, რომ დონალდ ტრამპმა ბრიუსელს პოლიტიკური დღის წესრიგი ჩამოუშალა.
მისი თქმით, აშშ-ს 47-ე პრეზიდენტი თვლის, რომ რუსეთთან პრაგმატული ურთიერთობები უფრო მომგებიანია და ამიტომ, ცეცხლის შეწყვეტა, უკრაინაში არჩევნები და ორ ქვეყანას შორის სამშვიდობო მოლაპარაკებები სწორ სტრატეგიად მიაჩნია. ზურაბ ქადაგიძე აღნიშნავს, რომ აშშ-ში ჩასულ ევროპელ ლიდერებს მოუწევთ დათანხმდნენ ტრამპს უკრაინაში არჩევნებზე ან ოლაფ შოლცის გზას გაუდგებიან, უკრაინაში კი ზელენსკის სახელმწიფო გადატრიალების ხარჯზე გადააყენებენ.
„ფაქტობრივად ბრიუსელს ულტიმატუმი წაუყენა ტრამპმა და ჩამოუშალა პოლიტიკური დღის წესრიგი.
ტრამპი თვლის, რომ რუსეთის იზოლაციაში მოქცევა უფრო დიდი საფრთხის შემცველია და უფრო დიდი რისკია მულტი-ვექტორული რუსეთ-ჩინეთის, რუსეთ/ირან/ინდოეთის კავშირების, „ბრიქსის“ გაერთიანების გაძლიერების და საბოლოო ჯამში, „დედოლარიზაციის“ პროცესის დაჩქარების, ვიდრე რუსეთთან პრაგმატული პოლიტიკა, საერთო ინტერესების პოვნა და ძალთა ბალანსი ვაშინგტონსა და კრემლს შორის.
ამ პროცესში, უკრაინის საკითხი ეგზისტენციალურია და ყველა მიზეზ გარეშე უნდა გადაჭრას, რაც შეიძლება ოპერატიულად, თუნდაც უკრაინის „კორეიზაციის“ ხარჯზე.
ამიტომაც:
1) ცეცხლის შეწყვეტა;
2) არჩევნები;
3) სამშვიდობო შეთანხმება;
– ყველაზე სწორ სტრატეგიად მიაჩნია ტრამპს.
აქედან გამომდინარე – ვაშინგტონში ჩასული საფრანგეთის პრეზიდენტი და ბრიტანეთის პრემიერი ან უკრაინის არჩევნებზე დათანხმდებიან ტრამპს, ან არა და, ოლაფ შოლცის გზას გაუყვებიან, ხოლო კონკრეტულად უკრაინაში, დიდი ალბათობით, სახელმწიფო გადატრიალებით დამთავრდება ზელენსკი.
(ტყუილად არ მოუხსენებია ტრამპს ურეიტინგო დიქტატორად.)
მოკლედ, წილი ნაყარია, ბრიუსელს აქვს შანსი, არჩევნებით მშვიდად გაუშვას ზელენსკი.
ყველაფერს აქვს დასასრული და ეს პროცესიც გავა ბოლოში. სამწუხაროდ, ამერიკა, რუსეთი და ევროპაც თავისას მიიღებს, ხოლო უკრაინა საერთოდ იარსებებს კი?!
P.S.
წარმოგიდგენიათ, რას მივიღებდით საქართველოს უკრაინიზაციითა და რა უბედურებას გადავურჩით?“, – წერს ზურაბ ქადაგიძე სოციალურ ქსელში.