NBC News: წიაღისეულის შეთანხმება არ არის საკმარისი იმისათვის, რომ ტრამპმა განაახლოს უკრაინის დახმარება
აშშ-ის პრეზიდენტმა დონალდ ტრამპმა პირადად განუცხადა თავის თანაშემწეებს, რომ ვაშინგტონსა და კიევს შორის ხელმოწერილი წიაღისეულის შეთანხმება საკმარისი არ იქნება უკრაინასთან დახმარებისა და დაზვერვის გაზიარების აღსადგენად, – ამის შესახებ NBC News ამერიკელი ოფიციალური პირების განცხადებებზე დაყრდნობით იუწყება.
ტრამპს სურს, რომ ქვეყნებმა შეთანხმებას, რომელიც აშშ-ს უკრაინის წიაღისეულის რესურსების წილს მისცემს, ხელი მოაწერონ. მაგრამ მას, ასევე, სურს შეიცვალოს უკრაინის პრეზიდენტის ვოლოდიმირ ზელენსკის დამოკიდებულება სამშვიდობო მოლაპარაკებების მიმართ, მათ შორის, რუსეთის სასარგებლოდ ტერიტორიის დათმობის მზაობის გამოხატვა.
ამავდროულად, აშშ-ის წარმომადგენლისა და ადმინისტრაციის წარმომადგენლის თქმით, აშშ-ს არ აქვს მინიშნება იმისა, რომ დაზვერვის გაზიარების შეწყვეტამ პირდაპირ იმოქმედა რუსეთის თავდასხმებზე. მათ განაცხადეს, რომ ეს დიდი თავდასხმები სავარაუდოდ დაგეგმილი იყო დაზვერვისა და დახმარების გადაცემის შეწყვეტამდე.
როგორც მედია წერს, ამავდროულად, ორივე ოფიციალური პირი ოპტიმისტურად არის განწყობილი, რომ იარაღისა და აღჭურვილობის მიწოდება, ისევე როგორც დაზვერვის გაზიარება, შეიძლება განახლდეს მომავალ კვირაში, განსაკუთრებით მას შემდეგ, რაც ზელენსკიმ განაცხადა, რომ უკრაინა მზად არის დაჯდეს მოლაპარაკებების მაგიდასთან რაც შეიძლება მალე.
ოფიციალურმა პირებმა განაცხადეს, რომ აშშ აგრძელებს უკრაინისთვის თავდაცვის დაზვერვის გაზიარებას – ეს არის ინფორმაცია, რომელიც ეხმარება უკრაინას თავდასხმებისგან თავის დაცვაში. მაგრამ ისინი არ აწვდიან ინფორმაციას რუსული სამიზნეების დამიზნების შესახებ.