logo_geo
eng_logo
გიორგი ცუცქირიძე: 2020-2024 წლებში რეგიონშიც და ევროპაშიც ყველაზე მაღალი - 5%-იანი ზრდა გვექნებ
- +

13 თებერვალი. 2020. 15:36

 

 

„2019 წელს, ბოლო წლებში პირველად, საქართველოს ეკონომიკის ზრდის ტემპმა საპროგნოზო მოლოდინს გადააჭარბა. 2019 წელს ეკონომიკურმა ზრდამ 5.2 პროცენტი შეადგინა, რაც სსფ-ს 4.6-პროცენტიან პროგნოზს აღემატება“, - ასე ეხმიანება ექსპერტი საბანკო-საფინანსო საკითხებში გიორგი ცუცქირიძე სოციალურ ქსელში საერთაშორისო სავალუტო ფონდის მისიის შეფასებას.

 

ექსპერტის თქმით, ეკონომიკურ ზრდაზე მხოლოდ პოზიტიურად აისახა როგორც წმინდა ექსპორტის ზრდის დინამიკა, ისე მიმდინარე ანგარიშის დეფიციტის შემცირებაც, რომელიც რეკორდულად დაბალ მაჩვენებლამდე დაფიქსირდა.

 

„საერთაშორისო სავალუტო ფონდის ახალი ანგარიში, რომელიც გასულ წელს აფასებს, განსაკუთრებით დღეს, როგორც არასდროს, რამდენიმე მიმართულებით არის მნიშვნელოვანი: 2019 წელს, ბოლო წლებში პირველად, საქართველოს ეკონომიკის ზრდის ტემპმა საპროგნოზო მოლოდინს გადააჭარბა. წინასწარი შეფასებების მიხედვით, 2019 წელს ეკონომიკურმა ზრდამ 5.2 პროცენტი შეადგინა, რაც სსფ-ს 4.6-პროცენტიან პროგნოზს აღემატება.

 

ამასთანავე, ბოლო წლებში ყველაზე მაღალი ზრდის მაჩვენებელია 2014 წლიდან მოყოლებული. ეკონომიკურ ზრდაზე მხოლოდ პოზიტიურად აისახა როგორც წმინდა ექსპორტის ზრდის დინამიკა, ისე მიმდინარე ანგარიშის დეფიციტის შემცირებაც, რომელიც რეკორდულად დაბალ მაჩვენებლამდე, მშპ-ს 4.4 პროცენტამდე დაფიქსირდა.

 

ასეთი დაბალი მაჩვენებელი არასდროს გვქონია და ესეც ეკონომიკური პოლიტიკის სწორ სტრატეგიაზე მიუთითებს, რაც ექსპორტისა და ადგილობრივი წარმოების ხელშეწყობაში მდგომარეობს. დიდწილად ამის შედეგია, რომ მაღალი ადგილობრივი მოთხოვნის მიუხედავად, რაც ეკონომიკურ ზრდაზე დადებით ზეგავლენას ახდენდა და ადასტურებს სიღარიბის დონის შემცირებასაც, ექსპორტი 12.4 პროცენტით გაიზარდა წინა წელთან შედარებით, ხოლო თანხობრივად ექსპორტმა რეკორდულ მაჩვენებელს - 3 771.5 მლნ აშშ დოლარს მიაღწია.

 

რაც მთავარია, წმინდა ექსპორტის ზრდის შედეგად, რაც ზრდის წამყვანი კონტრიბუტორია სავაჭრო დეფიციტი 489.0 მლნ აშშ დოლარით შემცირდა. მიმდინარე ანგარიშის დეფიციტის შემცირება, უზრუნველყოფს როგორც მაკროეკონომიკურ მდგრადობას, ასევე პოზიტიურად აისახება სავალუტო კურსზე. მოხსენებაში, ასევე, ხაზგასმულია, რომ საგადასახადო რეფორმამ, დღგ-ის ავტომატური სისტემის შემოღებამ და შემოსავლების ზრდამ შესაძლებელი გახადა სახელმწიფო ინვესტიციების ზრდა რეკორდულ მაჩვენებლამდე (მშპ-ს 8 პროცენტამდე), რაც მთავარია, ფისკალური დეფიციტი არ გაზრდილა და მშპ-ს 2.1 პროცენტი შეადგინა. ეს ფაქტორიც მნიშვნელოვანია იმ თვალსაზრისით, რომ გარდა საგადასახადო შემოსავლების ზრდისა, ხელს უწყობს ბიზნესაქტივობას და გვაძლევს კარგ შესაძლებლობას წარმატებით გადავიდეთ დღგ-ს რეფორმის ახალ ეტაპზე, რაც ევროპული დღგ-ის მოდელთან თავსებადობას ითვალისწინებს. ეს კი საშუალებას მოგვცემს, უკვე უახლოეს წლებში არა მხოლოდ გავზარდოთ საგადასახადო შემოსავლები, არამედ მოვიზიდოთ მეტი ინვესტიცია ევროკავშირის ქვეყნებიდან. რაც მთავარია, კიდევ უფრო შევამციროთ უმუშევრობა.

აქვე აღვნიშნავ, რომ ინვესტიციების ზრდაზე დადებითად აისახება EuCham-ის „საუკეთესო ევროპული ქვეყნები ბიზნესისთვის“ ახალი კვლევის შედეგებიც, სადაც საქართველო, ევროპის საუკეთესო ოცეულში მოხვდა 70 ქულით და მე-18 ადგილზე გავიდა. აღსანიშნავია, რომ ქვეყანა არა მხოლოდ რეგიონში, არამედ აღმოსავლეთ ევროპაში ზედიზედ მესამე წელია, პირველ ადგილზეა, გარდა ამისა, საქართველომ შეფასების შკალაში 70-ქულიანი ზღვარი გადალახა და პირველად ე.წ . „ყვითელი“ ზონიდან „მწვანე“ ზონაში, ანუ ყველაზე მაღალ ზონაში გადაინაცვლა. სწორედ ამ დადებითი ტენდენციების შედეგია, რომ მომავალ 2020-2024 წლებიც რეგიონშიც და ევროპაშიც ყველაზე მაღალი - 5 %-იანი ზრდა გვექნება, რაც, სიღარიბის დონის შემცირებასთან ერთად, დასაქმების ზრდასაც უზრუნველყოფს“, - წერს გიორგი ცუცქირიძე.

 

 

right_banner
არქივი
right_banner