logo_geo
eng_logo
ბონდო მძინარაშვილი: 2021 წელს გილოცავთ! მისურვებია: სული - წმინდა! გული - წრფელი!
- +

2 იანვარი. 2021. 22:29

 

 

საზოგადოებრივი მაუწყებლის ბორდის წევრი ბონდო მძინარაშვილი საზოგადოებას ახალ წელს ულოცავს და სოციალურ ქსელში წერს:

 

„ახალ, 2021 წელს გილოცავთ!

 

მისურვებია: სული - წმინდა! გული - წრფელი! ჯანი - მრთელი! ღონე - ძლიერი! 

 

ვაჟას 125 წლის წინათ დაწერილი ლექსი მომიძღვნია "ჩვენდა საწვრთნელად"!

 

სიმღერა:

 

 (ვუძღვნი ახალგაზრდა მგოსნებს)

 

არც-რა ტანთ მცვია, არც ფეხთა,

დავდივარ დედიშობილა,

მეც იმათ ჯოგიდამა ვარ,

ვინც სიღარიბით ცნობილა.

ამ წუთისოფლის თორნეში

ბევრი სხვა გამოცხობილა.

ჩემს გარდა ასეთს ყოფაში

მრავალი სხვაცა ყოფილა.

ყველას სამარე მიგველის,

ვინც დედის მუცლით შობილა.

საგმობიც ვიყო, ქედს არ ვხრი,

თავი მდიდარი მგონია,

ისეთი, თქვენმა ძმობამა,

ჯერ არვის გაუგონია.

მთლად მე მეკუთვნის ქვეყანა:

მთაში - მთა, ბარად - ბარია,

ზღვა და ხმელეთი ერთიან,

ცას - ვარსკვლავების ჯარია,

დილით მზე მანათობელი,

ღამის გუშაგი მთვარია,

მდიდართ სიმდიდრით ღიღინი,

ბეჩავთ ქვითინი მწარია,

ავდარი, ჟინჟლი, ცის ქცევა,

ცა მოწმენდილი, დარია;

დილით გაფურჩნა ვარდისა,

მთელი იმისი გვარია:

ია, უღრანს ტყეს მოსული,

თალხ-კაბა, ენა-მტკბარია,

კლდის თავს გაშლილი პირიმზე, -

მთის სასახელო ქალია;

მარგალიტივით მდელოზედ

ბრჭყვიალა დილის ცვარია.

ზამთრის ზვავების ქუხილი,

გაზაფხულს წვიმის ღვარია,

იქ ჯოჯოხეთი, სამოთხის

თუ დამიკეტეს კარია.

ხარს ვგევარ ნაიალაღარს,

რქით მიწასა ვჩხვერ, ვბუბუნებ;

ღმერთო, სამშობლო მიცოცხლე! –

მძინარიც იმას ვდუდუნებ;

საწყალთ საწყლობა რომ მესმის,

იმათ ვარამზე ვწუწუნებ;

არცროს უსაქმო არა ვარ,

მუდამ ვკოწიწობ, ვჩუჩუნებ.

ცოტა მაქვს, ცოტას ვჯერდები,

ბეჩავთაც გავუზიარებ.

სიკეთისათვის სიკეთეს

არავის დავუგვიანებ.

ავის თქმით, ავის ქცევითა

გულს არვის დავუზიანებ.

ხარს ვგავარ ნაიალაღარს,

რქით მიწასა ვჩხვერ, ვბუბუნებ:

ღმერთო, სამშობლო მიცოცხლე! –

მძინარიც იმას ვდუდუნებ;

საწყალთ საწყლობა რომ მესმის,

იმათ მაგივრად ვწუწუნებ;

ხანდახან ჟინი ამიღებს,

სიმღერას დავაგუგუნებ.

 

ვაჟა-ფშაველა

 

1896”, - წერს  ბონდო მძინარაშვილი.

 

 

right_banner right_banner
არქივი
right_banner