logo_geo
eng_logo
კახა კუჭავა: ამაყები ვართ, რომ სხვადასხვა გამოწვევის პირისპირ, ხალხსა და ქვეყანას სამშობლოზე შეყვარებული, ბრძოლისუნარიანი, თანამედროვედ აღჭურვილი ჯარი იცავს
- +

29 აპრილი. 2021. 11:42

 

 

„დღეს, ამაყები ვართ, რომ სხვადასხვა გამოწვევის პირისპირ, ხალხსა და ქვეყანას სამშობლოზე შეყვარებული, ბრძოლისუნარიანი, თანამედროვედ აღჭურვილი და მომზადებული ქართული ჯარი იცავს“, - ამის შესახებ პარლამენტის თავმჯდომარემ კახა კუჭავამ, საქართველოს თავდაცვის ძალების დღისადმი მიძღვნილ ღონისძიებაზე სიტყვით გამოსვლისას განაცხადა.

 

მისი თქმით, ოკუპაციის შედეგები მძიმე ტვირთად აწევს ქვეყანას, იზრდება საფრთხეები და მათი მასშტაბები.

 

„ქალბატონო პრეზიდენტო, ბატონო პრემიერ-მინისტრო, ბატონო თავდაცვის მინისტრო, ბატონო თავდაცვის ძალების მეთაურო, ბატონო სამხედრო კომიტეტის თავმჯდომარევ, დიპლომატიური კორპუსისა და საერთაშორისო ორგანიზაციების წარმომადგენლებო, პატივცემულო სამხედრო მოსამსახურეებო, ჩემთვის დიდი პატივია, მოგილოცოთ და თქვენთან ერთად აღვნიშნო საქართველოს თავდაცვის ძალების დღე.

 

მიმდინარე წელს, ისტორიულ თარიღებს ვზეიმობთ. 30 წლის წინ, თაობათა ერთობლივი ძალისხმევისა და თავდადების შედეგად, საქართველომ აღადგინა სახელმწიფოებრივი დამოუკიდებლობა და თანამედროვე, დემოკრატიული, ევროპული სახელმწიფოს მშენებლობის რთულ გზას შეუდგა.

 

მას შემდეგ რაც საქართველო არაერთი სირთულის წინაშე აღმოჩნდა, გავაცნობიერეთ ჩვენი ქვეყნისათვის ძლიერი თავდაცვის ძალების აუცილებლობა.

 

ბოლო წლებში გატარებული რეფორმების შედეგად, თავდაცვის ძალები ერთ-ერთ ყველაზე განვითარებულ სტრუქტურად ჩამოყალიბდა. ქართველი სამხედრო მოსამსახურეები იცავენ ჩვენი ქვეყნის დამოუკიდებლობას, სუვერენიტეტსა და მთლიანობას. ამავე დროს, საერთაშორისო პარტნიორების სამხედრო დანაყოფებთან ერთად, გამორჩეული წვლილი შეაქვთ საერთაშორისო მშვიდობის დაცვასა და უსაფრთხოების უზრუნველყოფაში. საქართველოს თავდაცვის ძალები თავსებადია ნატოს სტანდარტებთან და უმნიშვნელოვანეს როლს ასრულებს ჩვენი ქვეყნის ევროატლანტიკური ინტეგრაციის პროცესში.

 

დღეს, ამაყები ვართ, რომ სხვადასხვა გამოწვევის პირისპირ, ხალხსა და ქვეყანას სამშობლოზე შეყვარებული, ბრძოლისუნარიანი, თანამედროვედ აღჭურვილი და მომზადებული ქართული ჯარი იცავს.

 

საქართველოს თავდაცვის ძალების დღის აღნიშვნასთან ერთად, პატივს მივაგებთ იმ სამხედრო მოსამსახურეებს, რომლებმაც საკუთარი სიცოცხლე და ჯანმრთელობა ქვეყნის თავისუფლების იდეას და საერთაშორისო უსაფრთხოებას შესწირეს - ქედს ვიხრი მათი თავგანწირვის წინაშე. მათი ღვაწლის უკვდავყოფა თითოეული ჩვენგანის ვალია.

 

ქალბატონებო და ბატონებო, სამწუხაროდ, ჯერ კიდევ, საქართველოს ორი ისტორიული რეგიონი ოკუპირებულია, ოკუპაციის შედეგები კი მძიმე ტვირთად აწევს ქვეყანას. იზრდება საფრთხეები და მათი მასშტაბები. მუდმივად გვიწევს ინფორმაციულ და სხვა სახის ჰიბრიდულ თავდასხმებთან გამკლავება.

 

ამ პირობებში ხალხს განსაკუთრებით ეიმედება თავდაცვის ძალები - რომ შევძლებთ ჩვენი სახელოვანი გმირების მიერ დაწყებული საქმის გაგრძელებას - ჩვენი ქვეყნის ერთიანი ძალისხმევით დაცვას.

 

კიდევ ერთხელ გილოცავთ საქართველოს თავდაცვის ძალების დღეს!

 

მადლობას გიხდით თავდადებისა და სამშობლოს მიმართ გაწეული ღირსეული სამსახურისთვის“, - განაცხადა კუჭავამ.

 

თავდაცვის ძალების 30 წლისადმი მიძღვნილი საზეიმო ღონისძიება ვაზიანის სამხედრო ბაზაზე გაიმართა.

 

 

right_banner right_banner
არქივი
right_banner