logo_geo
eng_logo
არჩილ თალაკვაძე: ჯანმრთელობის დაცვა არანაირად არ მოდის წინააღმდეგობაში რწმენის საკითხთან
- +

23 მარტი. 2020. 19:28

 

 

„ჩვენი ოპონენტები იყვნენ ჩასაფრებულები და ყველანაირად ცდილობდნენ, ისე წარმოეჩინათ სიტუაცია, რომ თითქოს მართლმადიდებლური ეკლესია, რელიგიური ორგანიზაციები, საზოგადოება და ხელისუფლება სხვადასხვა მხარეს არიან და ერთმანეთთან აქვთ გაურკვევლობა - გამოჩნდა, რომ ამ გამოწვევის წინააღმდეგ ყველა ერთსულოვანია. როგორც ნახეთ, ეკლესიამ ძალიან სწორი პოზიცია დაიკავა და  მოუწოდა მრევლს, რომ დაიცვას ჯანდაცვის სამსახურების მიერ გაცემული რეკომენდაციები. მე დარწმუნებული ვარ, რომ მომავალშიც, თუ ჩვენ მოგვიწევს უფრო მკაცრი შეზღუდვების დაწესება, სამღვდელოება გააკეთებს ყველაფერს იმისთვის, რათა მრევლს აუხსნას, რომ ჯანდაცვა, ჯანმრთელობის და სიცოცხლის დაცვა და ამ  მიზნით გადადგმული ნაბიჯები არანაირად არ მოდის წინააღმდეგობაში რწმენის საკითხთან“,-ამის შესახებ განცხადება საქართველოს პარლამენტის თავმჯდომარე არჩილ თალაკვაძემ ტელეკომპანია „იმედის“ ეთერში გააკეთა.

 

 

 

პარლამენტის  თავმჯდომარის განცხადებით, ხელისუფლებას, ეკლესიას, მოქალაქეებს ამ საკითხთან დაკავშირებით აქვთ ერთსულოვანი პოზიცია და ეს არის საერთო საზოგადოებრივი ამოცანა, რომელიც ნებისმიერი მოქალაქის სიცოცხლის, უსაფრთხოების და ჯანმრთელობის დაცვას ეხება.

 

 

 

„აქ ჩვენ ყველას, როგორც მოქალაქეებს, როგორც ხელისუფლებას და როგორც ადამიანებს, ვისი მაგალითიც არის მისაბაძი, გვაქვს საერთო პოზიცია და მე წარმოუდგენლად მეჩვენება, რომ სახელმწიფოს რომელიმე მნიშვნელოვანი ნაწილი დადგეს განსხვავებულ მხარეს, როდესაც საქმე ეხება მოქალაქეების სიცოცხლეს და ჯანმრთელობას. თქვენ სწორი მაგალითი მოიყვანეთ, ჩვენ ვნახეთ, სასულიერო პირები როგორ მოუწოდებდნენ მრევლს, ამ რეკომენდაციების შესრულებისკენ და რეკომენდაციები, რომელიც ჯანდაცვამ გამოსცა, ეხება ჩვენი საზოგადოების ყველა წევრს, იმიტომ, რომ დღეს ხელისუფლების, ჩვენი ამოცანა და მოვალეობა არის მოქალაქეების სიცოცხლის და ჯანმრთელობის დაცვა და ჩვენ ამას გავაკეთებთ ყოველდღიურად. დარწმუნებული ვარ, რომ საქართველო ღირსეულად გაართმევს თავს ამ რთულ ვითარებას“,-განაცხადა არჩილ თალაკვაძემ.

 

 

 

 

 

right_banner
არქივი
right_banner