reportiori.ge - ბრავო, ბატონო ფრიდონ!
ჩვენ შესახებ პარტნიორები ქარტია ბმულები რეკლამა კონტაქტი
სამშაბათი, 09 აგვისტო, 2022. 02:12
საზოგადოება
ბრავო, ბატონო ფრიდონ!
08 იანვარი, 2015. 23:53



9 იანვარი, სახელგანთქმული ექიმის, აკადემიკოს ფრიდონ თოდუას დაბადების დღეა.

შარშან ამ დროს, 70 წლისთავი მივულოცეთ მას და წარმატებები ვუსურვეთ...

ამ ერთი წლის მანძილზე ამ ღვთისნიერმა კაცმა ბევრი კეთილი საქმე გააკეთა და მის მიერვე დაარსებული ინსტიტუტის თანამშრომლებთან ერთად ათეულობით ადამიანს "აუკრძალა" ავადმყოფობა და გააგრძელებინა ჯანმრთელი სიცოცხლის გზაზე მოძრაობა. სასიხარულოა ეს!

უშუალოდ ბატონი ფრიდონის ძალისხმევით ინსტიტუტმა მკურნალობის ახალი მეთოდები დანერგა, რომელთა შორის განსაკუთრებით გამოირჩევა სხივური თერაპიის მიმართულება. ინსტიტუტმა შეიძინა უნიკალური აპარატურა, რომლის ანალოგები დგას ევროპის ცნობილ კლინიკებში, ხოლო ასეთი აპარატურა ამიერკავკასიის სამკურნალო ცენტრებს ჯერ არ გააჩნიათ.

გერმანელ კოლეგებთან ერთად უკვე ასეულობით ადამიანმა გამოსცადა ეს სიახლე. მარტო ერთი ფაქტი: ამ აპარატურით მკურნალობის კურსი ევროპაში აღწევს 100 ათას ევროს, ხოლო "თოდუას კლინიკაში" 15-ჯერ ნაკლები ჯდება, რამეთუ ამ კლინიკის საქმიანობა აშკარად გამოკვეთილ სოციალურ ორიენტაციას ატარებს. უბრალო ენით თუ ვიტყვით, ეს იმას ნიშნავს, რომ სურვილის შემთხვევაში, ავადმყოფს აღარ მოუწევს უცხოეთში სამკურნალოდ წასვლა და ამის გამო უსაშველო თანხების მოძიებისთვის ნერვიულობა. საქმეში ჩახედული ადამიანებისთვის ცხადზე ცხადია, თუ რას ნიშნავს ეს ასეულობით სასოწარკვეთილი ადამიანებისთვის.

ბრავო, ბატონო ფრიდონ!

ბრავო, რამეთუ ღირსეული კაცია იგი, საიმედო, დასაყრდენი და საამაყო!

სწორედ ამიტომ, დაბადების დღეს ულოცავს "რეპორტიორი", რომლის ახალგაზრდა ჟურნალისტები გრძნობენ ამ ჩინებული ექიმის და მისი კოლეგების ადამიანურ სითბოსა და მზრუნველობას.

ახალიც შეგვეძლო დაგვეწერა, მაგრამ შარშანდელ, გულწრფელ მასალას განმეორებით და სიამოვნებით ვდებთ საიტზე და ამით საქვეყნოდ ვუცხადებთ ბატონ ფრიდონს სიყვარულსა და ერთგულებას.

მრავალჟამიერ, ექიმო!!!!!




კაცი!


ავტორი: ნუგზარ ფოფხაძე


 08 იანვარი, 2014


დიდი ხნის წინათ, ერთ ჩემს მეგობარს, სამედიცინო დახმარება დასჭირდა  და მოსკოვს გაემგზავრა. იმ დროს  მეც იქ აღმოვჩნდი და მისი თხოვნით კონსულტაცია გავიარე კომპეტენტურ ადამიანებთან, რჩევა ვიკითხე  საუკეთესო მკურნალის შერჩევის თაობაზე. ლეგენდარულმა ქირურგმა-აკადემიკოსმა,  თბილისში დაბადებულ-გაზრდილმა ვლადიმერ ბურაკოვსკიმ რომ მოისმინა უარყოფითი პასუხი მის მიერ დასმულ შეკითხვაზე, ვიცნობდი თუ არა ფრიდონ თოდუას, მირჩია: გაიცანი და ანდე შენი მეგობრის ჯანმრთელობა,  ჩინებული ექიმი,  ერთობ საიმედო კაციაო!


ახლაც მახსოვს რა ინტონაციით მითხრა: ჩინებული ექიმი!.. საიმედო კაცი!


მას შემდეგ გავიდა ნაცნობობის, თანამშრომლობის და მეგობრობის 35 წელი.


და ამ ხნის მანძილზე არ მქონია შემთხვევა, რომელიც სულ მცირე, პაწაწინა ეჭვს შეიტანდა დიდი ვლადიმერ ბურაკოვსკის რეკომენდაციაში.


ფრიდონ თოდუა დიდი დასტაქარია!

და ეს იცის არა მარტო სამედიცინო საზოგადოებამ და მთელმა საქართველომ, არამედ უამრავმა კოლეგამ, მეცნიერმა-მედიკოსმა ძალიან ბევრ ქვეყანაში!


ფრიდონ თოდუა ნაღდი კაცია! უღალატო მეგობარი!

და ბევრ ადამიანს რეალურად გამოუცდია მისი ექიმობის შედეგი, რაც პირდაპირ კავშირშია მის ვაჟკაცური ბუნებასთან, რისკთან, გაბედულებასთან, უანგარობასთან. და  ყველაფერი ეს იმაზე ღაღადებს, რომ იგი მართლაც დასაყრდენია, გაჭირვებულის დამხმარე, უშურველი! ასევე უღალატოა მეგობრების მიმართ. და მის ამ თვისებაზე არა და არ მოქმედებს არც პოლიტიკური კონიუნქტურა და არც ბიოგრაფიულ-კარიერული გარდატეხები.


ამ ხნის მანძილზე მასთან მიმართებაში ზემოთჩამოთვლილის გარდა, კიდევ ბევრი სასიამოვნო და დასაფასებელი "აღმოჩენა" გაკეთდა. და მათგან უმთავრესად დასაფასებელია ის, რომ


ფრიდონ თოდუა საქმის (!) კაცია-საქმის მკეთებელი, სხვისი საქმის მხარდამჭერი, წამხალისებელი, ხელისშემწყობი;

მის მიერ შექმნილი უნიკალური, თანამედროვე სამედიცინო ცენტრი და მისი კოლექტივის საქმიანობა იმაზე მეტყველებს, რომ აკადემიკოსი ფრიდონ თოდუა გახლავთ ბრწყინვალე ორგანიზატორი, სტრატეგი, ტაქტიკოსი, შედეგზე ორიენტირებული და, რაც მთავარია, პროგრესული აზროვნების, სიახლეების მოტრფიალე და პრაქტიკაში მისი დამნერგავი, ახალგაზრდა სპეციალისტების უანგარო გამზრდელ-დამაოსტატებელი, ნამდვილი პედაგოგი!


და კიდევ ერთი, რაც, ჩემი აზრით, ღირს რომ ახლა, სწორედ დღეს ითქვას, თანაც იმათ გასაგონად, ვისაც საქმის და სიკეთის კეთების მაგივრად შური და ქილიკი ხელეწიფებად (და ვინაიდან ბატონი ფრიდონი ანგელოზი არ არის, არც მოშურნე და მოქილიკე აკლია მას):  ასეთი რანგის, ავტორიტეტული სპეციალისტებისადმი, მეცნიერებისადმი, კულტურის მოღვაწეებისადმი,  მით უმეტეს, გამოჩენილი  ექიმებისადმი "ლტოლვა" ყველა დროის ხელისუფალს ახასიათებს. გამონაკლისი არც გასული ათწლეული იყო.


ობიექტურობა მოითხოვს იმის ხაზგასმით აღნიშვნას, რომ იმდროინდელი ხელისუფლების ინიციატივით დანიშნულ მეცნიერებათა აკადემიის ვიცე-პრეზიდენტს ფრიდონ თოდუას მოუხდა  დიდი სიბრძნის, მოქნილობის, თმენის, ზოგჯერ კი თავგანწირვამდე მისული პრინციპულობის გამოჩენაც, რათა ეროვნული მეცნიერებათა აკადემიისთვის აერიდებია, რბილად რომ ვთქვათ, არაკომპეტენტური ჩარევა, მავანის და მავანის უგნურება, რომლის საბოლოო მიზანი რეფორმა კი არა, ამ დიდი აკადემიის საბოლოო განადგურება გახლდათ;


ასევე, თავად ვარ მოწმე იმისი, რომ აკდემიის ვიცე-პრეზიდენტს ძალისხმევა არ დაუკლია, რათა აკადემიის სისტემის ცალკეული სტრუქტურების,  ცალკეული მეცნიერებისთვის არ გამოეტანათ დედაუნივერსიტეტის პროფესურისადმი გამოჩენილი  სამარცხვინო დამოკიდებულების მსგავსი სავარაუდო "გამანადგურებელი განაჩენი", რომელიც დღევანდელი გადასახედიდან არამცთუ სუბიექტური და უსამართლო იყო, არამედ,  პრიმიტიული ანგარიშსწორების გამოვლინებაც გახლდათ მაშინდელი ხელისუფლების  ზოგიერთი გათავხედებული მაღალჩინოსნის მხრიდან!


და ყოველივე ამას ფრიდონ თოდუა აკეთებდა უხმაუროდ, უანგაროდ! მეცნიერული სინდისის და პატრიოტული სულისკვეთების, თავმდაბლობის, ზნეობრივი პრინციპების მაქსიმალური დაცვით.


ასე კაცები იქცევიან!

ასე ცხოვრობენ საიმედო ადამიანები!

ამის დაუნახავობა და დაუფასებლობა უმადურობა იქნებოდა.

კეისარს კეისრისა!

გაიხარეთ, ბატონო ფრიდონ!







 

ხათუნა ლაგაზიძის პრესკონფერენცია
13.02.2016
კონსტანტინე გამსახურდიას პრესკონფერენცია
13.02.2016
''ერეკლე მეორის საზოგადოების'' პრესკონფერენცია
13.02.2016
ლევან გოგიჩაიშვილის პრესკონფერენცია
11.02.2016
ნინო მაჭავარიანის, რუსუდან კვალიაშვილის და ირმა მახათაძის პრესკონფერენცია
11.02.2016
დემურ გიორხელიძის პრესკონფერენცია
11.02.2016
პეტრე მამრაძის პრესკონფერენცია
11.02.2016
ომარ ნიშნიანიძის პრესკონფერენცია
11.02.2016
დიმიტრი ლორთქიფანიძის პრესკონფერენცია
10.02.2016
მანანა ნაჭყებიას პრესკონფერენცია
10.02.2016