დედაქალაქის მერმა კახა კალაძემ, მოადგილე ანდრია ბასილაიასთან ერთად, მთაწმინდის რაიონში, ლადო ასათიანის N50-ში მრავალფუნქციური სპორტული ცენტრი გახსნა.
როგორც მერმა აღნიშნა, ჯანსაღი ცხოვრების წესის პოპულარიზაციისა და ხელშეწყობისთვის მსგავსი პროექტების განხორციელება მნიშვნელოვანია.
„მთაწმინდის რაიონში მულტიფუნქციური ცენტრი გავხსენით. ამ პროექტის განხორციელება ძალიან მნიშვნელოვანი იყო, ვინაიდან აქ, ასათიანის ქუჩაზე ისტორიულად მდებარეობდა საკალათბურთო დარბაზი. თავდაპირველად გვინდოდა მისი რეაბილიტაცია, თუმცა იმდენად მძიმე მდგომარეობაში იყო, გადავწყვიტეთ მისი სრული დემონტაჟი და ავაშენეთ ახალი შენობა, სადაც განთავსებულია საკალათბურთო და საფეხბურთო მოედანი, ასევე, ფიტნეს სივრცე გასახდელებითა და საშხაპეებით. ცენტრი ყოველმხრივ კეთილმოწყობილია და რამდენიმე დღეში სრულად დაიწყებს ფუნქციონირებას. გარდა ამისა, როგორც იცით, ჩვენ მივიღეთ გადაწყვეტილება, რომ მულტიფუნქციური სივრცეები გარკვეული დროის განმავლობაში გავხადოთ უფასო საპენსიო ასაკის მოქალაქეებისთვის. აღნიშნული ცენტრიც ამ პროგრამაში ჩართული იქნება. ზოგადად, ჯანსაღი ცხოვრების წესის პოპულარიზაციისა და ხელშეწყობისთვის მსგავსი პროექტების განხორციელება მნიშვნელოვანია. მთაწმინდა გამოირჩევა ტერიტორიის და სივრცის ნაკლებობით და რა შესაძლებლობებიც მოგვცა აღნიშნულმა ფართმა, მაქსიმუმი გავაკეთეთ, რათა ეს ულამაზესი სივრცე შეგვექმნა“, – განაცხადა კახა კალაძემ.
ცენტრში განთავსებულია სპორტული დარბაზი კალათბურთისა და ფრენბურთისთვის, ასევე, სატრენაჟორო დარბაზი, საშხაპეები და გასახდელები. არსებული ცენტრი მოემსახურება 500-მდე მოზარდს კალათბურთის და ფრენბურთის მიმართულებით, ხოლო სატრენაჟორო დარბაზი გათვლილია 300-მდე ადამიანზე. ცენტრს ეტაპობრივად დაემატება სხვა პროგრამებიც.
მრავალფუნქციური სპორტული ცენტრის გახსნას, დედაქალაქის მერთან ერთად, თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსი ირაკლი გვილავა, მთაწმინდის რაიონის გამგებელი დავით კირკიტაძე, საქართველოს პარლამენტისა და დედაქალაქის საკრებულოს წევრები ესწრებოდნენ.
