დავით მათიკაშვილი: პრეზიდენტმა დააბრკოლა საარჩევნო კანონმდებლობაში შეტანილი მნიშვნელოვანი ცვლილებები
„დღეს, პრეზიდენტის ვეტო, რა თქმა უნდა, დაიძლევა. ეს არის ხელის შემშლელი გარემოება ქვეყანაში თავისუფალი, დემოკრატიული არჩევნების ჩატარების“, – ამის შესახებ იურიდიულ საკითხთა კომიტეტის თავმჯდომარის პირველმა მოადგილემ დავით მათიკაშვილმა განაცხადა.
„პრეზიდენტმა, როგორც ოპოზიციის რიგითმა წარმომადგენელმა, თავისი შესაძლებლობების ფარგლებში, მაქსიმუმი გააკეთა და დააბრკოლა საარჩევნო კანონმდებლობაში შეტანილი მნიშვნელოვანი ცვლილებები. წესი, რომელსაც პრეზიდენტი გვთავაზობს, ევროპის არცერთ ქვეყანაში მოქმედებს. შესაბამისად, საქართველოს ექსპერიმენტების ადგილად ვერ გადავაქცევთ“, – აღნიშნა მათიკაშვილმა.
დღეს პარლამენტში პრეზიდენტის მიერ საარჩევნო კოდექსში შესატან ცვლილებებზე დადებულ ვეტოს დაძლევენ.