კანადის საზოგადოებრივი უსაფრთხოების მინისტრი უცხოელ აგენტთა რეესტრის კანონპროექტზე: ინფორმირებული მოსახლეობა ჩვენი საუკეთესო დაცვაა
კანადის მთავრობამ კანონპროექტი წარადგინა, რომელიც მიზნად ისახავს კანადის პოლიტიკურ ცხოვრებაში უცხოური ჩარევის შეზღუდვას – დაწყებული სკოლის საბჭოებიდან და დამთავრებული თემთა პალატით.
უცხოელ აგენტთა რეესტრის შექმნა კანადის პრემიერ-მინისტრის, ჯასტინ ტრიუდოს დაპირება იყო, რომელიც მან შარშან დადო, მას შემდეგ, რაც მედიაში გავრცელდა ინფორმაცია კანადის არჩევნებში ჩინეთის ჩარევის მცდელობის შესახებ.
„კანონპროექტის უმეტესი ნაწილი მოითხოვს მათგან, ვინც მოქმედებენ უცხო ქვეყნების სახელით, რათა გავლენა მოახდინონ კანადის პოლიტიკაზე ან მთავრობაზე, დარეგისტრირდნენ ფედერალურ მთავრობაში. უცხოური აგენტების ასეთი რეესტრები არსებობს აშშ-სა და ავსტრალიაში“, – წერს CBC News.
მათ, ვინც დაარღვევს უცხოური გავლენის გამჭვირვალობის ახალი რეესტრის წესებს, მილიონობით დოლარის ფინანსური ჯარიმა და პატიმრობა შეიძლება დაემუქროს.
კანონპროექტი ასევე დანაშაულად აქცევს უცხოური სუბიექტის ან მისი სანდო პირის მიერ სკოლის მმართველობაზე გავლენის მოხდენის მცდელობას, რასაც კანონმდებლობა განსაზღვრავს, როგორც ყველაფერს სკოლის საბჭოდან დაწყებული უნივერსიტეტებითა და სხვა უმაღლესი სასწავლებლებით დამთავრებული.