top_leaderboard
left_sabechdi

ირაკლი ღარიბაშვილი „თბილისი პრაიდის“ მიერ საერთაშორისო პარტნიორებთან გაგზავნილ წერილზე: ყველა დესტრუქციული, პროვოკაციული და ანტისახელმწიფოებრივი ქმედების უკან დგას ოპოზიცია – ეს არის „ერთიანი ნაციონალური მოძრაობა“ მთელი თავისი დანაყოფებით

„ოპოზიცია არის გაშიფრული. 2021 წლის ივლისში ვინ იდგა ამ პროვოკაციის უკან? „თბილისი პრაიდი“. მათ უკან ვინ იდგა? ორგანიზაცია „სირცხვილია“. ვინ იდგა „სირცხვილიას“ უკან? სააკაშვილი და „ნაცმოძრაობა“. ეს არის ძალიან მარტივი მოცემულობა“, – ამის შესახებ ჟურნალისტებს „ქართული ოცნების“ თავმჯდომარე ირაკლი ღარიბაშვილმა განუცხადა.

„ყველა ამ დესტრუქციული, პროვოკაციული და ანტისახელმწიფოებრივი ქმედების უკან დგას ოპოზიცია. და ვინ არის დღეს ოპოზიცია რეალურად? სხვა ოპოზიცია არ არსებობს ქვეყანაში. ეს არის „ერთიანი ნაციონალური მოძრაობა“ მთელი თავისი დანაყოფებით. მე მინდა ვთქვა, რომ მაშინ ეს პროვოკაცია, რომელიც ქვეყნის წინააღმდეგ დაიგეგმა, კარგად გააზრებული პროვოკაცია იყო. რა მოხდა შარშან მარტის აქციების დროს? ვინ იდგა ამ აქციების უკან? რა თქმა უნდა, ეს იყო დესტრუქციული, პროვოკაციული ძალები, რომელთა უკანაც ისევ დგას „ნაცმოძრაობა“ და მათი სატელიტები. დღეს საუბარია იმაზე, რომ ისევ რაღაც ახალი პარტია შეიქმნა. როგორ შეიძლება დაიჯეროს ნორმალურად მოაზროვნე ადამიანმა, რომ ნიკა გვარამია ქმნის ახალ პარტიას, ან ნიკა მელია, ან „გირჩი“, „ლელო“ – ეს ერთი ორგანიზმია. ქართველი ხალხი არის ბრძენი. ეს დესტრუქციული, მტრული ძალები ქართველ ხალხს ვერ მოატყუებენ. ისინი არ ემსახურებიან ქართველი ხალხის ინტერესებს. მათი მიზანი იყო სხვა ქვეყნების ინტერესების და დავალებების შესრულება. 2 წლის წინ პირდაპირ მოუწოდებდნენ და მზად იყვნენ, რომ ქვეყანა ჩაერთოთ ომში. ეს იყო კოორდინირებულ მოქმედებათა მთელი ჯაჭვი, რომლის უკან იდგა ეს დესტრუქციული ძალა. ამიტომ ვიმეორებ, რომ ამ არჩევნებზე უნდა გავიმარჯვოთ ძლიერად, დამაჯერებლად. სუფთად უნდა ჩავატაროთ არჩევნები, რომ არც ერთი კითხვა არ დარჩეს ჩვენს მტრულ ძალებს“, – აღნიშნა ღარიბაშვილმა.

 

„ქრონიკამ“ ექსკლუზიურად მოიპოვა ოპოზიციის სტრატეგია, რომელსაც ლგბტ პროპაგანდის წინააღმდეგ ბრძოლის საკითხზე პარტიები მიჰყვებიან და რასაც „თბილისი პრაიდი“ ათანხმებს საერთაშორისო პარტნიორებთან. წერილიდან ირკვევა, რომ „თბილისი პრაიდი“ სამოქალაქო საზოგადოებასთან ერთად კანონპროექტის დამტკიცების შემთხვევაში საპროტესტო აქციებს გეგმავს.

 

ასევე იხილეთ