logo_geo
eng_logo
ვახტანგ ძაბირაძე: ხელისუფლება პროვოკაციებს უძლებს!
- +

21 მარტი. 2016. 16:49


პოლიტოლოგი ვახტანგ ძაბირაძე რუსეთის საგარეო საქმეთა მინსიტრის პირველი მოადგილის გრიგორი კარასინის განცხადებას საქართველოს მიმართ გაფრთხილებად აფასებს. როგორც ძაბირაძე აცხადებს, რუსეთი საქართველოში მიმდინარე პროცესებით შეშფოთებულია და ცდილობს, ხელისუფლება გარკვეულ პროვოკაციებზე წამოაგოს. ძაბირაძე საქართველოს ხელისუფლების წარმომადგენლებს სიმშვიდისა და გაწონასწორებული ქმედებებისკენ მოუწოდებს.


ამ და სხვა აქტუალურ თემებზე ვახტანგ ძაბირაძე „რეპორტიორს" ესაუბრა.


- რა თქმა უნდა, კარასინის განცხადება მნიშვნელოვანი ფაქტორი გახლავთ. უნდა ითქვას, რომ 2012 წლის შემდეგ რუსეთის ხელისუფლებას ასეთი მკვეთრი განცხადება საქართველოსა და მისი ხელისუფლების მისამართით არ გამოუთქვამს. მგონია, რომ ამ ყველაფერს წინ უძღვოდა ინფორმაცია, რომ აშშ­ის სახელმწიფო მდივანი აპირებს საქართველოში ჩამოსვლას და ასევე ამ ყველაფერთან კავშირშია ევროკავშირთან ვიზა­ლიბერალიზაციის პროცესი. რუსეთი შეშფოთებულია. რუსეთის მაღალ პოლიტიკურ წრეებში რაღაც პროცესები მიმდინარეობს, თუნდაც ის, რომ კარასინი ახლა რუსეთის მხრიდან მხოლოდ საქართველოსთან აღარ არეგულირებს ურთიერთობას და ის მოლაპარაკებებს აწარმოებს აფხაზეთთან და სამხრეთ ოსეთთან. მგონია, რომ ეს იყო გაფრთხილება. რუსეთი რომ თავის სტრატეგიულ ინტერესებს არ შეცვლის, ამის ილუზია ალბათ არავის უნდა ჰქონდეს. საქართველოს ხელისუფლება ამ ყველაფერს საკმაოდ გაწონასწორებულად და მშვიდად უნდა შეხვდეს და არ წამოეგოს პროვოკაციებს.


რუსეთის იარაღი ჩვენს წინააღმდეგ ყოველთვის იყო ის გარემოება, რომ საქართველო ხშირ შემთხვევაში, გარკვეულწილად თამაშობდა მის თამაშს და მის მიერ მოწყობილ პროვოკაციებზე ეგებოდა. შემდეგ ამას რუსული პროპაგანდა სათავისოდ იყენებდა და ყოველთვის გამოვდიოდით დამნაშავე თუ არა, პროცესების ხელისშემწყობი მაინც. ჯერჯერობით, ეს ხელისუფლება ამ პროვოკაციებს უძლებს. უნდა ავიღოთ მოცემულობა, რომ რუსეთი ასეთია და ვეცადოთ, მშვიდად და საღი აზრით შევხვდეთ მათ გამონათქვამებსა და მათ ნაბიჯებს. აღარ უნდა წამოვეგოთ პროვოკაციებს.


- ფარული კადრების გავრცელების საქმეზე მიმდინარე გამოძიებას როგორ შეაფასებდით? კმაყოფილი ხართ თუ არა ხელისუფლების რეაგირებით აღნიშნულ ფაქტზე?


- ძალიან მიჭირს ამ საქმის ტექნიკური ნაწილის გააზრება. მე თავად ამ ყველაფერში დიდად ვერ ვერკვევი. ექსპერტები აცხადებენ, რომ ეს არის საკმაოდ რთული საქმე, თუკი ის პროფესიონალის მიერ არის გაკეთებული. ამიტომ, არ მგონია, რომ ხელისუფლებამ სასწრაფოდ დადოს რაიმე შედეგი.


თუმცა, მეორე მხარეა, თუ რა ნაბიჯები გადადგა ხელისუფლებამ 2012 წლის შემდეგ მსგავსი ფაქტებისგან თავდასაცავად. იმ კადრების განადგურებით, თითქოს ყველანი დავმშვიდდით და ვფიქრობდით, რომ საკითხი მოვაგვარეთ. ასეთი განცდა იყო როგორც საზოგადოებაში, ისე პოლიტიკურ წრეებში. არადა, ყველას უნდა გვცოდნოდა, რომ ვინც ამ ყველაფერს იღებდა, ერთი ეგზემპლარი არ ექნებოდა. ის, რაც აქ დარჩა, დარჩა როგორც გაფრთხილება ხელისუფლებისთვის, რომ მათ ეს კადრები აქვთ. ამიტომ დატოვეს სპეციალურად. ყველა შემთხვევაში, მათთვის იყო ეს მომგებიანი.


საზოგადოებრივი აზრი, რა თქმა უნდა, უარყოფითად იყო განწყობილი ამ პროცესის მიმართ. ჩვენ რომ მოგვეხერხებინა და მეორე დღესვე შეგვეწყვიტა ამაზე საუბარი და მხოლოდ პროკურატურისთვის მიგვენდო საქმე, ეს ტალღა ჩაქრებოდა. მაგრამ, სამწუხაროდ, ჩვენმა საზოგადოებამ ეს არ ისურვა და პროცესი გრძელდება და ალბათ არჩევნების პერიოდშიც გაგრძელდება. ვისაც ეს კადრები აქვს, ის ხვდება, რომ რეზონანსი იქნება და ხვალ და ზეგ გავრცელების სურვილი კვლავ გაუჩნდება.


- თქვენი აზრით, ვინ შეიძლება იდგეს ამ ყველაფრის უკან?


- აქ დიდი საფიქრალია რამე? რა ვქნათ ახლა, „ნაციონალური მოძრაობა" არის ისეთი, როგორიც არის. ცდილობს, რომ აქცენტი გადაიტანოს ერთი საკითხიდან მეორეზე. სამწუხაროდ, ამას აჰყვა საზოგადოებაც და შედეგიც სახეზეა. ეს ქმნის კადრების კვლავ გავრცელების წინაპირობას.


საკმაოდ ჭკვიანურად არის ყველაფერი გაკეთებული. ეს რომ ყოფილიყო ხელისუფლების რომელიმე წევრზე, ვიტყოდით, რომ „ნაციონალებმა" გააკეთეს. რომ ყოფილიყო „ნაციონალებზე", დავაბრალებდით ხელისუფლებას. ახლა კი მოიძებნა საშუალო პოლიტიკური ძალა, რომელზეც გაკეთდა აქცენტი. მე მაინც მგონია, რომ ეს იყო ნიადაგის მოსინჯვა, თუ რა რეაგირება მოჰყვებოდა საზოგადოებაში.


- არასამთავრობო ორგანიზაციები ამ მიმართულებით კანონმდებლობის გამკაცრებას ითხოვენ. ემხრობით თუ არა ამ ინიციატივას?


- კი ბატონო, გავამკაცროთ კანონმდებლობა, მაგრამ ეს რას გვიშველის? კი ბატონო, დავუშვათ, სასჯელი გავხადეთ 5-დან 10 წლამდე და რას შეცვლის ეს, თუ დამნაშავეს ვერ ვიპოვით? უბრალოდ, დარჩება ნორმა.

 

- პარლამენტმა ქორწინებასთან დაკავშირებული ცვლილებების საჯარო განხილვის მიზნით საორგანიზაციო კომისია შექმნა. თქვენი პოზიცია როგორია, კონსტიტუციაში უნდა ჩაიწეროს თუ არა, რომ ქორწინება არის ქალისა და კაცის ნებაყოფლობითი ერთობა?


- ამ ყველაფერს პროვინციალიზმის ელფერი დაჰკრავს. მაგრამ, ისევ უნდა შევხედოთ ამას საზოგადოების გადმოსახედიდან. საზოგადოების რაღაც ნაწილი ამაზე გულწრფელად რეაგირებს, რაღაც ნაწილი ამას იყენებს სხვა მიზნებისთვის. სამწუხაროდ, იქამდე მივედით, რომ დასავლური ღირებულებები და ქართული ტრადიციები ერთსქესიანთა ქორწინებამდე დავიყვანეთ. ამიტომ, ეს არის საკითხი, რომელიც კონსტიტუციაში თუ იქნება, არაფერი დაშავდება და ამით მოვხსნით დაძაბულობას, რომელიც უფრო მნიშვნელოვანია. ასევე ამ ჩანაწერით მოიხსნება ის შეტევა დასავლეთზე, რომელიც ახლა მიმდინარეობს. პოლიტიკური გადაწყვეტილებაა მისაღები. ჩემი აზრით, ეს პოლიტიკურად გამართლებული იქნება. 


 

right_banner
right_banner right_banner
არქივი
right_banner